Astana ákimi I.Tasmaǵambetov jylý berý maýsymynyń aıaqtalýyna oraı keńes ótkizdi
ANA. 14 sáýir. QazAqparat /Gúlmıra Álıakparova/ - Astanada kúzgi-qysqy jylý berý maýsymy aıaqtaldy. Osyǵan oraı búgin, qala ákimi Imanǵalı Tasmaǵambetovtyń tóraǵalyq etýimen keńes ótip, jylýmen qamtamasyz etý qyzmetteriniń esepteri tyńdaldy.
2010-2011 jyldarǵy jylý berý maýsymyna ázirlik jumystaryn júrgizý úshin ótken jyldyń 30 sáýirinde qalalyq shtab qurylyp, 7 qazanda jylytý maýsymy bastaldy. Shtabtyń málimetterine sáıkes, jylý berý maýsymynyń basyna turǵyn úıler 100 paıyzǵa daıyn boldy, 1836 turǵyn úıdiń 63-ine daıyndyq pasporttary eskertýlermen berildi.
«Astana Energııa» AQ qalany jylýmen qamtamasyz etý úshin alty aıda 1-shi jáne 2-shi JEO-larda 1 mln. 785 myń tonna kómir (nemese 26 641 vagon) jáne 11 myń 851 tonna mazýt (nemese 215 tsısterna) jumsady. Jylý energııasyn jiberý kórsetkishi 3 mln. 783 myń Gkal. qurady, bul ótken jylǵy kórsetkishtermen salystyrǵanda 1,8 paıyzǵa az. Ótken qysta aýa raıy qolaıly bolǵandyqtan elektr energııasy 2010 jyldyń sáıkes kezeńimen salystyrǵanda 5,9 paıyzǵa az jaǵylyp, saǵatyna 1 mln. 518 myń kVt-ty qurady.
Jeke jylytý júıeleri bar turǵyn úı keshenderdiń 251-den 303-ke deıin artýyna baılanysty 2010 jylǵy 16 sáýirden bastap «Astana-Jylýtranzıt» AQ bazasynda PIK tóraǵalary men qyzmet kórsetetin basqa da mekemeler úshin jylý berýdi basqarýdyń avtomattyq júıesi men esepteý quraldaryn paıdalaný boıynsha kýrstar uıymdastyrylyp, 121 maman daıarlandy.
Sondaı-aq ótken maýsymda 3 574 tonna (nemese 146 tsısterna) suıytylǵan kómirsýtegi gazy bosatyldy, bul onyń aldyńǵy maýsymmen salystyrǵanda 338 tonnaǵa az. «Astana Gaz Qyzmet» JShS 1215 kóppáterli turǵyn úıdi, ıaǵnı 68 728 tutynýshyny gazben qamtamasyz etedi.
Jeke turǵyn úı sektoryn sýmen qamtý úshin 593 sý kolonkasy ornatylyp, 411-i janasyna aýystyryldy.
Qalalyq shtabtyń jetekshisi, ákim orynbasary Vasılıı Krylov atap kórsetkendeı, búgingi tańda qalanyń barlyq kommýnaldyq qyzmetteri men energetıkalyq keshen kásiporyndary aldaǵy jylý berý maýsymyna daıyndyq sheńberinde jóndeý baǵdarlamalaryn bekitip, ony júzege asyrýǵa kirisip ketti.
