Astana ákimi I.Tasmaǵambetov «Jyldyń eń úzdik muǵalimine» páter kiltin tabys etti

Búgin Kongress-Holl saraıynda aldaǵy jeksenbi, 2 qazan kúni atap ótiletin muǵalimder kúnine arnalǵan saltanatty jıyn ótti.

«Bylaıǵy jurt bala baǵbanyna balap, qoǵamnyń ary men aqyly sanalatyn «ustaz» uǵymy - búkil qoǵam qurmetteıtin, qadiri mol erekshe kásip, buqaralyq ári búkilhalyqtyq mereke. Bul oraıda, jyldaǵy qalyptasqan dástúrmen tól qýanyshtaryńyzǵa arnalǵan saltanatty sharada ózderińizben kezekti márte kezdesip otyrmyz. Bul tek bir kúnge ǵana arnalǵan jedel jıyn emes. Biz jyl saıyn ár basqosýymyzda muǵalimder máselesine tereń nazar aýdaryp, bilim berý isin, qyryn-syryn tyńǵylyqty zerdeleýge tyrysyp kelemiz. Onyń nátıjesi kóz aldymyzda. Elordalyq bilim sapasynyń búgingi kúni respýblıkadaǵy eń úzdik kórsetkishi - osynyń aıqyn aıǵaǵy bolsa kerek», dep atap ótti óziniń quttyqtaý sózinde elorda ákimi I.Tasmaǵambetov.

Jıyn barysynda I.Tasmaǵambetov Astananyń úzdik bilim berý mekemeleri baıqaýlarynyń jeńimpazdaryn marapattady. Máselen, «Jyldyń eń úzdik mektebi» atanǵan №54 mektep-lıtseıdiń 10 ustazy bir jyl boıy eńbekaqylaryna qosymsha 50 paıyz ústeme alatyn bolady. «Úzdik mektepke deıingi mekeme» atalymynda №27 «Balaýsa» balabaqshasy jeńimpaz atansa, «Úzdik kásiptik mekemelerdiń» arasynda jetim balalarǵa arnalǵan №6 kásiptik lıtseı top jardy. Sondaı-aq, «Úzdik qosymsha bilim berý mekemesi» ataǵy «Shyǵys» balalar men jasóspirimder ortalyǵyna buıyrsa, №1 Ońaltý ortalyǵy «Úzdik arnaıylandyrylǵan mekeme» atandy.

Al «Jyldyń úzdik muǵalimi» atanǵan №38 mektep-lıtseıiniń ınformatıka pániniń oqytýshysy Qadyrǵazy Muqanov qala basshysynyń qolynan páter kiltin aldy.

Astanalyq ustazdarǵa QR Bilim jáne ǵylym mınıstriniń quttyqtaýyn jetkizgen vıtse-mınıstr Murat Orynhanov ta sharaǵa qur alaqan kelmedi. Onyń qolynan 4 pedagog «Qazaqstan Respýblıkasy bilim berý isiniń qurmetti qyzmetkeri» belgisin, taǵy 4 ustaz QR Bilim jáne ǵylym mınıstrliginiń Y.Altynsarın atyndaǵy tós belgisin aldy.

Aıta keteıik, búginde eldiń bas qalasy - Astanada orta jáne kásiptik bilim berý mekemelerinde 9500-ge jýyq pedagog jumys isteıdi. Olardyń 85,5 paıyzy joǵary bilimdi, 50 paıyzǵa jýyǵy birinshi jáne joǵarǵy sanattaǵy ustazdar.

Saltanatty shara kontserttik baǵdarlamamen jalǵasty.