Astana ákimi I.Tasmaǵambetov Álemdegi temekimen kúres jolyndaǵy bas qaıratkerlerdiń qataryna kirdi - DDU
ASTANA. Mamyrdyń 31-i. QazAqparat /Jasulan Amanbaıuly/ - Dúnıejúzilik densaýlyq saqtaý uıymy Astana qalasynyń ákimi Imanǵalı Tasmaǵambetovti temekimen kúresý isine qosqan úlesi úshin marapattady,
dep habarlaıdy QazAqparat.
Dúnıejúzilik uıymnyń atalǵan syılyǵy I. Tasmaǵambetov Almaty qalasynyń ákimi bolyp qyzmet atqarǵan kezde 2005-2011 jyldarǵa arnalǵan «Almaty - temeki tútininen arylǵan qala» atty baǵdarlamany bekitip, osy baǵytta úlken sharalardy atqarǵany úshin berilip otyr.
Dúnıejúzilik densaýlyq saqtaý uıymynyń bul marapaty jylyna tek 6 adamǵa ǵana beriledi. I. Tasmaǵambetovten bólek, bul syılyqqa Norvegııa hanazadasy jáne Danııa hanshaıymy -syndy tulǵalar nomınanttar atanǵan. Syılyq TMD elderi aımaǵynda tuńǵysh ret Astana ákimi I. Tasmaǵambetovke berildi.
«Biz Imanǵalı Tasmaǵambetov myrzanyń temekige qarsy jumysyn, onyń osy istegi jetekshilik rólin erekshe baǵalaımyz. Osy sharalar qalalyq deńgeıden shyǵyp, búkil elge taralatynyna senimdilik bildiremiz», deıdi DDU Eýropa bıýrosynyń basshysy Manfred Hıýber.
Almatylyq baǵdarlamanyń jetistikteri aıqyn. Qolǵa alynǵan sharalardyń nátıjesinde, temeki shegý deńgeıi jasóspirimder arasynda 4,5 paıyzǵa, medıtsına qyzmetkerleri arasynda 15 paıyzǵa tómendegen. Sonymen qatar atalǵan baǵdaralamanyń negizinde temekimen kúresýshi úkimettik emes uıymdardyń jelisi qurylyp, TMD elderinde joq arnaıy temeki nıkotıninen emdeıtin statsıonar ashyldy.
