Astana ákimi halyqtyń ótinishteri men shaǵymdaryn jeke baqylaýyna almaq
ASTANA. QazAqparat - Búgin Astana qalasynyń ákimdiginde qala basshysy Ádilbek Jaqsybekovtiń tóraǵalyǵymen apparattyq keńes ótti. Keńes barysynda ákim qaladaǵy aǵymdaǵy jaǵdaı boıynsha esepti tyńdap, problemalyq jáne áleýetti máselelerge toqtaldy, dep habarlaıdy qalalyq ákimdiktiń baspasóz qyzmeti.
- Memleket basshysy aldymyzǵa aýqymdy ári kúrdeli mindetter qoıdy. Olar ekonomıkalyq ósimge, elordanyń ınvestıtsııalyq klımatyn jaqsartýǵa serpin beredi. Bul qurylys, kólik jáne basqa da mańyzdy salalarǵa, sonyń ishinde energııa tıimdiligin arttyrýǵa baǵyttalǵan salalarǵa qatysty, - dedi Á. Jaqsybekov.
Atalǵan másele «EKSPO-2017» halyqaralyq mamandandyrylǵan kórmesin ótkizý qarsańynda asa ózekti. Búginde Astanany el ordasy, Eýrazııanyń geografııalyq ortalyǵy retinde ǵana emes, sondaı-aq «jasyl ekonomıkany» damytýǵa bet alǵan tehnologııalyq, ǵylymı, «aqyldy» qala retinde de tanystyrý kerek.
Jańa mindetterdi júzege asyrý úshin barlyq qalalyq qurylymdar jumylyp jumys isteý kerek.
- Sizderdiń árqaısylaryńyz Astanany damytýdyń ortaq, jahandyq maqsatyn, tutastaı jaǵdaıdy kórip, ózara qalaı áreket etý keregin túsinýge tıissizder. Apta saıyn ótkiziletin osyndaı jınalystar sol úshin qajet, - dedi ákim.
Qala basshysy kommýnaldyq qyzmetterdiń jumysyn jaqsartý jónindegi máselelerge basa nazar aýdardy. Bul eń aldymen qar tazalaýǵa, qalany jylý men elektr energııasymen qamtýǵa qatysty.
Ákim Astana ákimdiginiń resmı saıtyndaǵy «Vırtýaldy qabyldaý», «Halyqtyq baqylaý» aıdarlaryna jáne «051» qyzmetine kelip túsken ótinishter men shaǵymdardy jeke baqylaýyna aldy. Qala ákimi orynbasarlary men aýdan ákimderine birinshi kezekte azamattardan kelip túsken aryz-shaǵymdardy tıisti sheshimin tapqansha nazarda ustaýdy tapsyrdy.
