Astana ákimi G-Park-tiń problemaly úıleri týraly aıtty
«Keıbir nysandar boıynsha Qalalyq orta sapasy jáne baqylaý basqarmasynyń suraqtary bar. Olar qujattardyń tolyq sáıkes kelmeýine jáne qurylys jumystarynyń keıbir qujattarsyz bastalýyna qatysty. Bul negizinen jerdi rásimdeýmen baılanysty. Qazir «G-Park» osy máselelerdi tez arada joıýmen aınalysyp jatyr jáne búkil nysandar zańdy túrde salynatyn bolady», - dedi ákim búgin Ortalyq kommýnıkatsııalar qyzmetindegi brıfıngide BAQ ókilderiniń saýalyna jaýap bere otyryp.
Jeńis Qasymbek keshe «G-Park» keńsesinde ákimdik ókilderimen jáne úleskerlermen birge kezdesý ótkenin atap ótti. Turǵyndarǵa qazirgi jaǵdaı týraly tolyq málimet usynylǵan.
«Barlyq nysannyń qurylysy aıaqtalady. Olardyń keıbiri mejeli merziminen keshigip jatyr. Biraq ákimdik ol nysandardy qatań baqylap otyrady. Olar salynyp bitedi jáne osy turǵyn úı keshenderine ınvestıtsııa salǵan adamdar óz páterlerin alady», - dep túıindedi Jeńis Qasymbek.
Eske salsaq, bıyl sáýirde jerdi rásimdeýdegi zańsyz áreketi úshin «G-Park» kompanııasyna tıesili «Dýblın» jáne «Vashıngton» turǵyn úı keshenderi súriletinin jazyp edik. Keıin «Vashıngton» turǵyn úıi surilmeıtin boldy, qurylys kompanııasyna jiberilgen aqaýlardy joıyp, barlyq qajetti ruqsat qujattaryn resimdeý tapsyryldy.
