Astana ákimi elordalyq polıtsııa qyzmetkerlerine 40 qyzmettik kóliktiń kiltin tabys etti (FOTO)
ASTANA. QazAqparat - Astana qalasynyń ákimi Ádilbek Jaqsybekov qazaqstandyq polıtsııa kúni merekesinde elordalyq ishki ister departamentiniń qyzmetkerlerine Qazaqstanda qurastyrylǵan Peugeot, Skoda jáne Ssang Yong Kyron markaly 40 qyzmettik avtokóliktiń kiltin tabystady.
Polıtseılik avtokólikterdiń qataryn tolyqtyrǵan avtomobılder otandyq qurastyrý ónimderi bolyp tabylady. Barlyq kólik ІІO málimetter derekqoryna enýge múmkindigi bar borttyq kompıýterlermen jabdyqtalǵan. Kompıýterlermen qatar, kólikterge qalalyq telefon baılanys qyzmeti bar zamanaýı jańa radıostansalar, oǵan qosa, jedel kezekshilerge polıtsııa jasaqtaryn tıimdi basqarýǵa múmkindik jasaıtyn GPS spýtnıktik júıesi ornatylmaq.
«Memleket basshysy óziniń 5 ınstıtýtsıonaldyq reformany júzege asyrý baǵytyndaǵy «100 naqty qadam» baǵdarlamasynda polıtsııany jańa sapaly kezeńge kóterý úshin birqatar mańyzdy tapsyrma bergen bolatyn. Quqyq qorǵaý organdary qyzmetkerlerin memlekettik qyzmet júıesine qosý jáne jergilikti polıtsııa qyzmetin qurý polıtsııa qyzmetiniń, Astana qalasy ishki ister departamenti jumysynyń uıymdastyrylýyna oń áser etedi», - dedi Á.Jaqsybekov.
Qyzmettik avtokólikter parkin jańartý - memlekettiń quqyq qorǵaý organdary qyzmetiniń sapasyn arttyrýǵa baǵyttalǵan keshendi sharalarynyń bir bóligi ǵana. Polıtsııa qyzmetkerleriniń málimetinshe, jańa avtokólikter jol-patrýldik polıtsııasy, ýchaskelik ınspektorlar men ıývenaldy polıtsııa ınspektorlaryna beriledi. Qyzmettik tehnıka jaqyn kúnderi elorda kóshelerinen kórinbek.
Aıta keteıik, elordalyq polıtsııanyń tehnıkalyq-materıaldyq bazasy jyldan-jylǵa jaqsarýda. Qalalyq ákimshiliktiń kómeginiń arqasynda avtopark qyzmettik avtokólikterge kóbeıip, polıtsııa qyzmetiniń jedeldigi men sapasyna tıimdi áser etip, elorda turǵyndarynyń qaýipsizdigi men quqyqtyq tártipti nyǵaıtýǵa septigin tıgizedi. Polıtsııanyń materıaldyq-tehnıkalyq bazasyn jaqsartýdyń sheńberinde kompıýterler, beınebaqylaý kameralary, avtokólikter, baılanys quraldary alynyp, olar quqyq buzýshylyqtardyń aldyn alý men jolyn kesýde, qoǵamdyq tártipti qorǵaýda oń nátıje beredi.
