Astana ákimi elordalyq mektep bitirýshilerdi quttyqtap, 75 túlekke «Altyn belgi» tabys etti

«Búgin barshamyz úshin - erekshe kún. Ata-ana úshin baýyr eti - balapanynyń qanat qaqqan, ustaz úshin mańdaı teri - shákirtiniń úki taqqan tamasha sáti. Al búkil el úshin - azamatqa úmit artqan tarıhı mezet. Qýanyshtaryńyz qutty bolsyn qadirli aǵaıyn! - dep bastady sózin qala basshysy. - Bilim berý - qashan da ata-ananyń bala aldyndaǵy qasterli qaryzy, tutas qoǵamnyń urpaq aldyndaǵy qasıetti paryzy. Al bilim alý - erteńiniń eńseli bolǵanyn qalaıtyn qaı jannyń da júrekke túıgen boryshy. Dese de, bul ómirde bilimdi de jalyndy jasty bıikke jeteleıtin uly qudyret bar. Ol - arman. Armansyz adam joq. Bizderdiń - ustazdar men ata-analardyń armany - ul-qyzdarymyzdyń azamat atanyp, týǵan eldiń abyroıy ǵana emes, kúlli adamzattyń aqyl-oıy bolǵanyn kórý. Sizderdiń - jas túlekterdiń armany - berekeli de baıandy baq, mazmundy da maǵynaly bolashaq. Onyń ózi - tuzy jeńilge emes, tuǵyry bıik, talaby keńge, bilimi tereń, eńbegi kópke ǵana buıyratyn dúnıe. Ol úshin ilim men bilim jolyndaǵy tynymsyz talpynys pen úzdiksiz izdenis qajet. Bul bizdiń búgingideı jańalyǵy jelmen jarysqan, oı-órisi ǵaryshpen talasqan zańǵar zamannyń basty ári biregeı talaby. Osyny esten shyǵarmaǵaısyzdar!».

Sondaı-aq qala basshysy osynaý sezimdi sátti eldigimizdiń qasıetti ordasynda, qalamyzdyń ósıetti ortasynda «Qazaq eli» alańynda qarsy alyp turǵandaryn basa aıtyp, munyń ózi - úlken mártebe, zor qýanysh ekendigin jetkizdi.

«Bolashaq bilimde desek, sol bilimniń bel ordasy bolý da bizdiń qalamyzdyń enshisinde. Kúni keshe ótken Ulttyq biryńǵaı testide jalpylaı emes, jalqylaı alsaq, qalamyzdan 75 bala «Altyn belgi» taǵyp, aqjoltaı úmitti aqtap shyqty. Bul jaqsy kórsetkish. Dese de, «ómir - ózen, taǵdyr - teńiz» degen. Basqasha aıtqanda, «ómir óz retimen, al taǵdyr qashanda taýqymetimen» bolmaq. Sizder búgin ómirdiń alǵashqy mejesinen óttińizder. Endigi taǵdyr óz qoldaryńyzda. Óz basym bul maqsat-mindettiń de údesinen shyǵyp, tabys bıigine tý tigetinderińizge kámil senimdimin», - dedi I.Tasmaǵambetov.