Astana ákimi elordaǵa kelý tártibi men turaqty turýǵa tirkeý tártibin kúsheıtýdi usynady
ASTANA. QazAqparat - Astanaǵa kelý tártibi men turǵyndardy turaqty turýǵa tirkeý tártibin kúsheıtý qajet. Búgin QR Bas prokýratýrasynda ótken Zańdylyqty qamtamasyz etý, quqyqtyq tártip jáne qylmyspen kúres jónindegi Úılestirý keńesiniń kezekti otyrysynda Astana qalasynyń ákimi Imanǵalı Tasmaǵambetov osyndaı usynys aıtty.
«Astana qalasynda qylmys jasaǵan tulǵalardyń jalpy sany bir jylda 3 myń 753 adam bolsa, olardyń 691-i nemese 18 paıyzy ǵana elorda turǵyndary bolyp otyr. Al qalǵan 3 myńnan astam qylmysker nemese olardyń 78 paıyzy basqa óńirlerden kelgender», - dedi qala ákimi.
Budan bólek, I. Tasmaǵambetov buryn qylmys jasaǵan tulǵalar úshin de Astana qalasy asa tartymdy bolyp otyrǵanyn atap ótedi. Onyń sózine qaraǵanda, joǵaryda atalǵan qylmys jasaǵan tulǵalardyń 283-i buryn sotty bolǵandar eken.
«Astana túrli baǵyttaǵy uıymdasqan qylmystyq toptar, avtourlyqpen aınalysatyndar, esirtkiniń zańsyz aınalymymen aınalysatyn qylmyskerler, urylar úshin de tartymdy. Bul rette buryn sotty bolǵan tulǵalardyń, bas bostandyǵynan aıyrý oryndarynan shyqqandardyń júris-turysyn baqylaý óńirlerde durys jolǵa qoıylmaǵany, tıisti deńgeıde atqarylmaıtyny baıqalady. Osy turǵydan kelgende, Astana qalasynda bolý tártibi men kóshi-qonnyń baqylaý úderisin aıryqsha kúsheıtken oryndy. Elordada turaqty turý úshin azamattardy tirkeý tártibin retteýdi usynamyz. Degenmen, meniń oıymsha, qansha qataıtqanymyzben, biz elordaǵa halyqtyń aǵylýyn toqtata almaımyz. Jyl saıyn Astanaǵa basqa qaladan kelgen 50 myńnan astam azamatty turaqty turýy úshin tirkep kelemiz. Al byltyrǵy jyly olardyń sany 78 myńnan asty», - dedi I. Tasmaǵambetov.
«Biz buǵan deıin de azamattardyń Astanada turaqty turý tártibine baılanysty zańnamalyq norma engizý týraly usynys jasaǵanbyz. Máselen, Konstıtýtsııa boıynsha azamattardyń respýblıka aýmaǵynda emin-erkin júrip turýyna quqyq berilgen. Soǵan sáıkes, basqa óńirlerden kelgender Astanada jumyspen aınalysýyna, ózi qalasa turaqty turýyna bolady, alaıda olar memlekettik qordan baspana alýǵa, balabaqsha mekemelerine kezekke turýǵa birden ótinish bere almaıtyn bolýy kerek. Olar bul úshin bes jyl boıy Astanada turýlary shart. Bul da elordaǵa qaraı aǵyn úderisin báseńdetýdiń bir amaly», - deıdi qala ákimi.
