Astana ákimi elorda turǵyndaryn Otan qorǵaýshy kúnimen quttyqtady
ASTANA. QazAqparat - Astana qalasynyń ákimi Áset Isekeshev elorda turǵyndary men qonaqtaryn Otan qorǵaýshy kúni merekesimen quttyqtady. Ákimniń quttyqtaýynyń mátini elorda ákimdiginiń arnaıy saıtynda jarııalandy.
«Qurmetti astanalyqtar jáne qala qonaqtary! Sizderdi 7 mamyr - Otan qorǵaýshy kúni merekesimen shyn júrekten quttyqtaımyn! Bul kún búginde barsha el bolyp atap ótetin mańyzdy merekege aınaldy. Halqymyz ejelden-aq «Er - el qorǵany, batyr - halyq qalqany» dep elge súıenish, jurtqa pana bolǵan erlerdi erekshe ardaq tutqan. Jeńispen órilgen uly tarıhymyz Otan úshin ot keshken Tolaǵaılarǵa kende emes. Halyq óz batyryn qurmet tutqan. Eldik jolynda kúresken ulandar qashan da ulyqtaýǵa laıyq. Búginde óziniń 25 jyldyq mereıtoıyn atap ótkeli otyrǵan Qazaqstan Qarýly Kúshteriniń áskeri aıbyndy, ári memlekettiń berik qorǵany. Otan aldyndaǵy azamattyq boryshyn abyroımen qorǵaıtyn qyrandarymyz kóp bolǵaı. Aspanymyz árdaıym ashyq, halqymyz baqytty bolsyn!»-delingen ákimniń quttyqtaýynda.
