Astana ákimi birinshi kýrstyqtardy stýdentter qataryna qabyldanýymen quttyqtady (FOTO)
ASTANA. QazAqparat - Astana qalasynyń ákimi Ádilbek Jaqsybekov «Jańa beles - 2015» stýdentter qataryna qabyldaýǵa arnalǵan is-sharaǵa qatysty.
Merekelik is-sharaǵa elordanyń barlyq JOO birinshi kýrs stýdentteri qatysty, dep jazady astana.kz . Jyl saıyn olardyń qataryna Qazaqstannyń barlyq mektepteriniń myńdaǵan túlekteri qosylady. Bıyl elordanyń joǵary oqý oryndaryna 12 208 stýdent túsken, onyń 6004 stýdenti - ózge óńirlerdiń ókilderi.
Bıylǵy jyly belsendi, shyǵarmashyl, talantty jáne jarqyn jastar ókilderi stýdentter qataryn tolyqtyrdy. Stýdenttik ómirdiń alǵashqy kúninen-aq olardyń boıyna elordanyń áleýmettik-mádenı qyzyǵýshylyǵyn darytý, joǵary oqý oryndarynyń stýdentterimen dostyq baılanys ornatýǵa yqpal etý mańyzdy.
Birinshi kýrstyqtardy quttyqtaı otyryp, Á.Jaqsybekov Elbasy saıasatynyń arqasynda búgingi tańda elimizde eń sapaly jáne qoljetimdi bilim alý úshin barlyq jaǵdaı jasalǵandyǵyn atap ótti.
- Memleket Elbasymyzdyń saıasatynyń arqasynda jastardyń búgingi kúni kez kelgen bilimdi alýy úshin qoldan kelgenniń barlyǵyn jasap jatyr. Bizdiń qalamyz osy bilimderdiń ortalyǵy bolyp tabylady. Astanada jaqsy oqyp, ári qoǵamdyq, saıası, mádenı jáne sporttyq ómirdiń qaınaǵan ortasynda júrýge bolady. Sizder jaqsy bilim alyp, qalamyzdyń damýyna, elimizdiń damýyna úlken úles qosasyzdar dep senemin. Sizderdi quttyqtaımyn, búkil stýdenttik jyldaryńyzǵa tabys jáne jaqsy kóńil-kúı tileımin,- dedi elorda ákimi.
Stýdentter qataryna qabyldaýǵa arnalǵan saltanatty rásim aıasynda joǵary oqý oryndary belsendileriniń sherýi ótti, oǵan elordanyń joǵary oqý oryndarynyń eń úzdik stýdentteri qatysty. Іrikteý kezinde birinshi kýrstyqtardyń tek ýnıversıtettiń qoǵamdyq jáne ǵylymı ómirine qatysýy ǵana emes, sondaı-aq qalalyq is-sharalarǵa belsendi qatysýy da eskerildi. Bul kúni olar ózderiniń ataýly stýdenttik bıletterin aldy.
Qala ákiminiń qolynan L.Gýmılev atyndaǵy EUÝ stýdenti, Jambyl oqýlarynyń júldeli orynynyń ıegeri, aǵylshyn tili boıynsha respýblıkalyq ǵylymı jumystardyń jeńimpazy, matematıka jáne hımııa pánderi boıynsha olımpıada júldegeri, «Altyn belgi» ıegeri Ádilet Shymbaev pen Nazarbaev ýnıversıtetiniń stýdenti, ótken jyly matematıkadan ótken halyqaralyq olımpıadanyń kúmis júldegeri, Nazarbaev Ýnıversıtet Amerıka hımııalyq ınjenerler ınstıtýty stýdentter sektsııasynyń (AIChE NU SC) basqarma múshesi Altyn Jelambaeva bıletterin birinshi bolyp aldy.
Birinshi kýrstyqtardyń dástúrli valsi qazirgi zamanǵy bılerge ulasty. Elimizdiń belgili mýzykalyq ujymdary men jańadan bastap jatqan stýdentter jobalary, «Jaıdarmen» KTK komandalary, tanymal dı-djeıler jelileri keshti odan ári este qalarlyqtaı etti.
