Astana ákimi básekege qabilettiliktiń úsh faktoryn atady

ASTANA. QazAqparat – Elorda ákimi Jeńis Qasymbek básekege qabiletti damýdyń basty faktorlaryn atady, dep habarlaıdy QazAqparat tilshisi.

«Astana – «Eýrazııanyń júregi» dep maqtanyshpen aıta alamyz. Ǵasyrlar boıy qazaq jerinde birtutas ult qura otyryp, túrli etnostardyń ókilderi qıylysqan. Bizdiń kúshimiz – birlikte. Álemniń basqa qalalarymen salystyratyn bolsaq, Astanany eń jyldam damyp kele jatqan qalalardyń biri. Qalalar adamzattyń bolashaǵy ekenin bárimiz túsinemiz. Qalalardyń ǵalamdyq jelisi jańa shyndyqtyń ekonomıkalyq jáne saıası negizine aınaldy. Іri qalalar ekonomıkanyń draıveri», - dedi Jeńis Qasymbek elordada ótip jatqan Astananyń baýyrlas qalalar forýmynda.

Sondaı-aq, qala basshysy básekege qabilettiliktiń úsh faktoryn atady. Ol – jahandyq ekonomıkaǵa tartylǵan saýda sektorlarynyń bolýy, qalanyń talanttardy tartý qabileti jáne ınnovatsııalardyń úzdiksiz generatsııasyn qamtamasyz etetin ınnovatsııalyq ekojúıe.

«Trendte bolý úshin, joǵary sapaly ómirdi qamtamasyz etýimiz kerek. Bizdiń qalada bıznes júrgizetinderge jáne qaýipsiz ári jaıly ómir súrý úshin jaǵdaı jasaý qajet. Qazirgi ýaqytta tehnologııany, ekonomıkany jáne tájirıbe almasýdy damytý burynǵydan da mańyzdy. Búgingi forým aıasynda ózekti máseleler kóteriletinine senimdimin, Ár qatysýshy ózin tolǵandyrǵan saýaldarǵa jaýap ala alady degen oıdamyn», - deıdi ol.

Aıta keteıik, elordada Memleket basshysynyń qatysýymen baýyrlas qalalar forýmy ótip jatyr.