Astana ákimi balalarǵa jańajyldyq shattyq syılady
ASTANA. 28 jeltoqsan. QazAqparat - Búgin qala ákimi Imanǵalı Tasmaǵanbetovtiń atynan Oqýshylar saraıynda elordalyq búldirshinder kópten kútken jańajyldyq shyrsha ótkizildi.
Oǵan qalanyń balalar úılerindegi jetim balalar, jalpy bilim berý mektebiniń oqýshylary, elordanyń daryndy, oqý ozattary, olımpıada, baıqaýlary men festıvalderdiń jeńimpazdary, júldegerleri, jalpy sany 150 búldirshin qatysty.
Tamasha bezendirilgen zaldyń orta tusynda jańajyldyq merekeniń sáni, kórkem oıynshyqtarmen kómkerilgen alyp shyrsha qoıylǵan. Kesh qatysýshylary ony aınalyp, merekelik ánder aıtyp, bı bıledi, oıyn oınap, túrli baıqaýlar ótkizdi. Ýaqyt ata, Er tóstik, Kúnekeı qyz jáne Shyǵys kúntizbesindegi jyldyń on eki aıynyń ataýyn ıelengen janýarlar, balalar asyǵa kútken Aıaz ata men Qarshaqyz búldirshinderge shat-shadyman kóńil- kúı, ulan-asyr dýman syılady.
Búldirshinderdi jańajyldyq merekelerimen quttyqtaǵan qalalyq Bilim basqarmasynyń bastyǵy Ásıma Bımendına, «eldiń maqtaýly azamattary bolyńdar», - degen tilek aıtty. - «Men búgin 2013 jyldy bizge Elbasy Nursultan Nazarbaev syılaǵan jańa Oqýshylar saraıynda Aıaz ata men Qarshaqyzben jáne túrli ańyz, ertegilerdiń keıipkerlerimen birge qarsy alyp jatqanymyzǵa qatty qýanyp turmyn», - dedi ol.
Merekeniń sońynda barlyq kishkentaı qatysýshylar Aıaz ata men Qarshaqyzdan jańajyldyq syılyqtar aldy.
