Astana ákimi azyq-túlik baǵasynyń ósýin boldyrmaýdy tapsyrdy
Qala ákimi jekelegen azyq-túlik ónimderiniń joǵary baǵalaryna ekonomıkalyq taldaý jasaýdy jáne olardyń baǵasyn tómendetýge qatysty naqty usynystar engizýdi tapsyrdy.
«Baǵanyń ósýine jol berilmeıtin bizdiń tarapymyzdan bekitilgen azyq-túlik tiziminde tek 19 pozıtsııa bar. Onyń ishinde kókónisterden tek qana kartop, qyryqqabat, sábiz jáne pııaz bar. Halyq úshin qajetti jemister, qyzanaq, qııar jáne basqa da kókónister joq. Jalpy aıtqanda, bul taýarlardyń baǵasyn eshkim rettemeıdi», - dedi Astana basshysy.
Ol bir keli qyzanaq nemese qııar baǵasynyń 800-den 1000 teńgege deıin nemese odan da joǵary turatynyn tilge tıek etti.
«Az qamtylǵan otbasylardyń eshqaısysy ony satyp ala almaıdy», - dedi Baqyt Sultanov.
Qala ákiminiń orynbasary Malıka Bekturovanyń aıtýynsha, aqpan aıynda Astanada ınflıatsııa qańtar aıynyń deńgeıinde qalǵan. Ol 100,8% (respýblıka boıynsha 7 oryn), al áleýmettik mańyzy bar azyq-túlik taýarlar ındeksi ótken aptada 101,2% (respýblıka boıynsha - 0,6%) qurady.
«Der kezinde qabyldanǵan sharalar boıynsha aınalym qarajatyn tolyqtyrý sheńberinde saýda jelilerine jeńildikti kredıt berý arqyly qarjylandyrý áleýmettik mańyzy bar taýarlardyń 2017 jyly 15 sanatyn, 2018 jyly 22 sanatyna baǵany tómendetýge jáne turaqty ustaýǵa múmkindik berdi. Turaqtandyrý qory qurylǵan. Búgin onda qant, kúrish, qaraqumyq, kartop jáne sábiz bar. Osy taýar túrlerine baǵa 15% joǵary kóterilgende qaladaǵy saýda obektilerinde taýar ınterventsııalary ótkiziledi», - dedi M. Bekturova.
Onyń sózinshe, saýda úılerin kredıtteý arqyly baǵany turaqtandyrý óz nátıjesin bergen. Qazirdiń ózinde jobaǵa «Magným», «Shaıyr», «Metro», «Keńmart» saýda jelileri, «Sapar» bazary, «AstanaEkostandart» JShS, «Agrokapıtal» JShS jáne basqalar qatysýǵa daıyn.
Sonymen qatar, Bekturova «Shapaǵat» bazarynyń jekeshelendirilýine baılanysty «AQ Astana» ÁKK-ǵa bazardyń jańa menshik ıeleri tarapynan tenderlik sharttardyń saqtalýyn erekshe baqylaýdy usyndy.
Qala ákimniń aıtýynsha, búgin Qazaqstannyń kóptegen óńirlerinde nan baǵasy kóterilgen. Basty sebep - unnyń tapshylyǵy. B.Sultanov budan buryn qala ákiminiń orynbasary Malıka Bekturovaǵa «Astana» áleýmettik kásipkerlik korporatsııasynyń mehanızmderi arqyly elordanyń naýbaıhanalaryna undy jetkizýdi tapsyrǵan bolatyn. Óz kezeginde M. Bekturova, ótken aptada Premer-Mınıstrdiń birinshi orynbasary Álıhan Smaıylov Aýyl sharýashylyǵy jáne Ulttyq ekonomıka mınıstrlikterine nannyń qymbattaýyn boldyrmaý úshin tıisti usynystar engizý boıynsha tapsyrma bergendigin jetkizdi.
«Biz óz tarapymyzdan usynys engizdik. Qazirgi kezde Azyq-túlik korporatsııasy arqyly máseleni sheship jatyrmyz. Bul másele apta sońyna deıin sheshiledi», - dedi Bekturova.
Qala ákimi sondaı-aq, Memleket basshysy memlekettik organdardyń qyzmeti azamattardyń ál-aýqatyn jaqsartýǵa baǵyttaýdy tapsyrǵandyǵyn eske saldy. Osy maqsatta 1 qańtardan bastap kommýnaldyq qyzmetter tarıfteri, birqatar áleýmettik tólemniń mólsheri ulǵaıtyldy, halyqtyń ál-aýqatyn kóterý sharalary júzege asyrylyp jatyr. «Nur Otan» partııasynyń sezinde Memleket basshysy halyqtyń áleýmettik osal toptarynyń kiristerin arttyrý boıynsha tapsyrma bergen.
Osyǵan baılanysty Baqyt Sultanov óz orynbasary M. Bekturova men Astana qalasynyń ınvestıtsııalar jáne kásipkerlikti damytý basqarmasynyń basshysy Álisher Ábdiqadyrovqa áleýmettik mańyzy bar azyq-túlik taýarlary baǵasynyń ósýine jol bermeýge, turaqty baqylaýdy qamtamasyz etýdi jáne olardyń maýsymdyq ósimine jol bermeý, ásirese mereke kúnderi baǵanyń kóterilýin boldyrmaýdy tapsyrdy.
«Áleýmettik mańyzy bar azyq-túlik taýarlarynyń tizimine kirmeıtin azyq-túlik ónimderiniń joǵary baǵalaryna ekonomıkalyq taldaý jáne aıqyn negizdeýdi qamtamasyz etińiz jáne olardyń baǵasyn tómendetýge qatysty naqty usynystar engizińiz», - dedi B. Sultanov.
