Astana ákimi áıelderdi 8 naýryz merekesimen quttyqtady
ASTANA. QazAqparat - Halyqaralyq áıelder kúni qarsańynda Astana qalasynyń ákimi Ádilbek Jaqsybekov názik jandylardy merekelerimen quttyqtady. Búgin saltanatty sharada ákim apparatynyń qyzmetkerlerine qurmet kórsetildi, dep habarlady qalalyq ákimdiktiń baspasóz qyzmetinen.
- Ardaqty hanymdar, sizder jaqsylyqtyń, jylýlyqtyń, náziktik pen mahabbattyń nyshanysyzdar. Balalardyń tárbıesi, úıdiń bereke-birligi sizderdiń arqalaryńyz. Osynyń bárin sizder qyzmetpen ońaı ushtastyra alasyzdar, sizder árdaıym sulý jáne súıkimdisizder, - dedi quttyqtaý sózinde qala ákimi. Ádilbek Jaqsybekov elordanyń damýyna qosqan súbeli úlesteri men kúndelikti tabandy eńbekteri úshin áıelder qaýymyna rızashylyǵyn bildirdi. - Qalamyzdy kórkeıtip jatqan sizderdiń jumystaryńyzǵa zor senim bildirip, alǵys aıtamyn. Kóktemniń osy shýaqty kúninde sizderge myqty densaýlyq, barlyq bastamalaryńyzǵa tabys, otbasylaryńyzǵa bereke tileımin, - dedi ákim. Astana qalasy ákiminiń apparatynda 517 áıel qyzmet atqarady, olardyń 189 basqarýshy qyzmette, 328 - mamandar. Olardy quttyqtaýǵa osy kúni názik jandylarǵa gúl shoqtary men mýzykalyq syılyqtar jasaǵan ákimdiktiń barlyq er azamattary jınaldy.
