Astana ákimi aýrýhanalardaǵy jaǵdaıdy retke keltirýdi tapsyrdy
ASTANA. QazAqparat - Astana qalasynyń ákimi Áset Isekeshev Densaýlyq saqtaý basqarmasyna jáne basqa da jaýapty organdar men qyzmetterge az ýaqyttyń ishinde aýrýhanalar men olardyń janyndaǵy aýmaqty retke keltirýdi tapsyrdy, dep habarlaıdy QazAqparat ákimdiktiń resmı saıtyna silteme jasap.
Qala turǵyndarynan shaǵymdardyń kóp túsýine baılanysty Astana ákimi №1 qalalyq balalar aýrýhanasynda kóshpeli otyrys ótkizdi. Otyrys barysynda aýrýhanalarǵa kólikterdiń kire almaýy, mekemege aparatyn jaıaý júrginshiler joldarynyń jaǵdaıy, osy aýdandarda jyly aıaldama pavılondarynyń bolmaýy jáne t.b. máseleler qaraldy.
Elorda basshysy Áset Isekeshev «Almaty» aýdanynyń ákimdigine qarjy qarastyryp, №1 qalalyq aýrýhananyń ortalyq aýlasyn abattandyrýdy, az ýaqyttyń ishinde áleýmettik nysandardyń (aýrýhanalar, mektepter, balabaqshalar, kolledjder, ýnıversıtetter jáne t.b.) aýmaǵyndaǵy jaıaý júrginshiler joldaryna, trotýarlarǵa qospalar sebý jumystaryn júrgizýdi; ú.j. 12 jeltoqsanyna deıin áleýmettik nysandar aýmaǵyn sanıtarlyq tazartý jáne osy sııaqty máselelerdi anyqtaý boıynsha tekserý júrgizýdi; elordalyq Іshki ister departamentine áleýmettik mańyzdy nysandardyń janynda jol belgilerin qoıý syzbasy men logıstıkasyn qaıta qaraýdy tapsyrdy.
«Qalalyq qyzmetterdiń barlyq kúshi elorda turǵyndaryna jaıly jaǵdaı jasaýǵa baǵyttalýy kerek», - dedi ákim.
