Astana ákimi «Astana-Ormany» JShS ujymyna avtobýs kiltin tabys etti
ASTANA. 29 maýsym. QazAqparat - Elordanyń týǵan kúni qarsańynda Astana qalasynyń ákimi Imanǵalı Tasmaǵambetov ákimdiktiń úzdik qurylymdyq bólimshelerine syılyqtar tartý etti.
Bul týraly shahar basshysynyń baspasóz qyzmetinen habarlady.
Reıtıngtiń qorytyndysyna sáıkes «Úzdik aýdan» atalymyn «Almaty» aýdany jeńip aldy. I.Tasmaǵambetovtyń aıtýynsha, ujymnyń tabystylyǵyna abattandyrý boıynsha qoıylǵan mindetterdi sheshý baǵytynda aýdandyq ákimdiktiń barlyq qyzmetkerleriniń atqarǵan úlken jumysy áser etti.
Turǵyn úı basqarmasy úzdik memlekettik organ atandy. Ákimniń sózine súıensek, basqarma baspanaǵa zárý azamattardy qamtamasyz etýdiń qıyndyǵyna jáne jaýapkershiligine qaramastan, atalmysh jumysty sátti ári nátıjeli oryndaýda.
Elbasynyń bas qalanyń aınalasynda «jasyl beldeý» qurý tapsyrmasyn oryndaýdaǵy eleýli jetistikteri úshin «Astana-Ormany» JShS qalalyq kásiporyndardyń arasynda úzdik tanyldy.
«Almaty» aýdany ákimdiginiń jáne turǵyn úı basqarmasynyń barlyq qyzmetkerlerine syıaqy tabystalmaq. Al «Astana-Ormany» JShS ujymyna avtobýs kilti tartý etildi.
Qurylymdyq bólimsheler qyzmetin baǵalaý barysynda bıýdjettik qarjyny jáne qyzmetkerlerdi basqarý boıynsha jumystyń nátıjeliligi, qujat aınalymyn uıymdastyrý, aqparattyq tehnologııalardy kádege jaratý, joǵary memlekettik organdardyń tapsyrmalaryn oryndaý sekildi kórsetkishter nazarǵa alyndy.
