Astana ákimi «Altyn belgi» ıegerlerine tósbelgi tapsyrdy - FOTO
ASTANA. QazAqparat - Búgin elordadaǵy «Qazaq eli» alańynda Astana ákimi Imanǵalı Tasmaǵambetov UBT qorytyndysy boıynsha ózderiniń bilimin dáleldegen 92 «Altyn belgi» ıegerine tósbelgi tapsyrdy.
«Kúni keshe ótken Ulttyq biryńǵaı testini qalamyzdan 3252 oqýshy tapsyryp, onyń ishinde 1 081 balanyń árqaısysy júzden joǵary ball jınady. Munyń ózi - úlken kórsetkish, zor maqtanysh. Sizder kórsetken bul jetistik ózderińizden keıingi ini-qaryndastaryńyzdyń yntasyn oıatyp, «men astanalyq oqýshymyn» degen sezimine serpin beretin úlken úlgi, maqtan tutar ónege. Óz basym sizderdiń álemniń ozyq kóshinen qalmaı, ýaqyttyń talabynan talmaı, talaı tabystyń bıiginen kórinetinderińizge kámil senimdimin!» - dedi qala ákimi.
Aıta keteıik, 2013-2014 oqý jylyn Astana mektepterin 4042 oqýshy támamdady. UBT kezinde 3 oqýshy 124 ball aldy. Jalpy oqý jylynyń qorytyndysy boıynsha 362 oqýshy birqatar shet memleketterde ótken halyqaralyq olımpıadalar men ǵylymı jobalar baıqaýyna qatysyp, 234 medal ıelendi. Sonymen qatar 158 oqýshy jalpy orta bilim pánderi boıynsha Respýblıkalyq olımpıadalar men Respýblıkalyq ǵylymı jobalar baıqaýyna qatysty. 85 qatysýshy júldeger atanyp, medalmen marapattaldy.
