Astana ákimi áleýmettik-mádenı nysandardyń basshylaryna jylý merzimine daıyndyq kýálikterin resimdeýdi bir aptada aıaqtaýdy tapsyrdy
ASTANA. Qyrkúıektiń 14-i. QazAqparat /Gúlmıra Álıakparova/ - Astana qalasynyń ákimi Imanǵalı Tasmaǵambetov qalalyq bilim berý, densaýlyq saqtaý jáne mádenıet nysandarynyń basshylaryna jylý merzimine daıyndyq kýálikterin resimdeýdi bir apta ishinde aıaqtaýdy tapsyrdy.
I.Tasmaǵambetov, jylý maýsymyna daıyndyq máseleleri bilim berý, densaýlyq saqtaý jáne mádenıet salalary basshylarynyń jiti nazarynda qala berýi tıistigin qadap aıtyp, qysqa ázirlik týraly kýálikterdi resimdeýdi bir aptanyń ishinde aıaqtaýdy tapsyrdy.
Sondaı-aq ol, barlyq nysandarda jylý berýdi retteıtin jáne esepteıtin júıelerdi ornatýdy, órtke qarsy júıelerdi jóndeý jáne olardy qalpyna keltirýdi, dabyl júıelerin ornatýdy qolǵa alýdy sondaı-aq, ústimizdegi jyly iske qosylǵan balabaqshalardyń, bilim berý mekemeleri men basqa da áleýmettik-mádenı nysandardyń ınjenerlik júıelerindegi aqaýlyqtardy joıýdy júktedi.
Ákimniń sózine qaraǵanda, bas qaladaǵy áleýmettik-mádenı uıymdardy qysqa daıyndaý tolyǵymen aıaqtalǵan bolsa, turǵyn úılerde bul jumystar áli de júrgizilýde. «Jylý maýsymynyń qalypty ótýin qamtamasyz etetin barlyq keshender bizde jalpy jaman emes. Sondyqtan maýsymǵa daıyndyq bar dep aıtýǵa negiz bar», - dedi ol.
Aıta keteıik, Astanada ortalyqtan jylytylatyn úılerge jylý aldaǵy qazan aıynyń 15-inen bastap beriledi.
