Astana ákimi aldaǵy aıazdy kúnderge baılanysty qala turǵyndaryn eskertti

ASTANA. QazAqparat - Elorda ákimi Áset Isekeshev aldaǵy kúnderi temperatýranyń tómendeýine baılanysty qala turǵyndaryn qaýipsizdik sharalaryna nazar aýdarýǵa shaqyrdy, dep habarlaıdy QazAqparat.

«Qazgıdromettiń málimetterine sáıkes, kelesi aptada, ıaǵnı 22 qańtardan bastap, ásirese 23-26 qańtar aralyǵynda aýa-raıy kúrt sýytyp, aýa temperatýrasy -35 - 40 gradýsqa deıin tómendeýi múmkin. Osyǵan baılanysty barlyq qalalyq qyzmetterge, ásirese úzdiksiz jylý energııasymen qamtamasyz etetin energetıkterge aıazdy kúnderge daıyn bolý úshin tapsyrma berdim», - dep jazdy qala ákimi Feısbýktegi paraqshasynda.

Sonymen qatar barlyq mekteptermen jáne balabaqshalarmen tıisti sharalardy júrgizý boıynsha Bilim basqarmasyna tıisti tapsyrma berildi. Budan bólek, qajet bolǵan jaǵdaıda kómek kórsetý úshin ári jedel áreket etý turǵysynda Densaýlyq basqarmasyna men Іshki ister departamentine de tapsyrma júkteldi.

«Qalalyq qyzmettermen barlyq tıisti sharalar qabyldanatyn bolady.Qala turǵyndaryna, qurylys, saýda, kólik jáne basqa da uıymdarǵa osy aqparatty nazarǵa alyp, adamdardyń densaýlyqtary men ómirlerin, qaýipsizdigin qamtamasyz etý boıynsha barlyq qadamdardy qarastyrýdy suraımyn», - dedi Áset Isekeshev.