Astana ákimi Á. Jaqsybekov pen Pavlodar oblysynyń ákimi Q. Bozymbaev memorandýmǵa qol qoıdy
ASTANA. QazAqparat - Búgin elordada Astana ákimdigi men Pavlodar oblysynyń ákimdigi arasynda saýda-ekonomıkalyq qatynasty júzege asyrý jónindegi memorandýmǵa qol qoıyldy.
Bul qujatty Astana ákimi Ádilbek Jaqsybekov pen Pavlodar oblysynyń ákimi Qanat Bozymbaev bekitti. «Osy memorandým sapaly ári arzan azyq-túlik ónimderimen qamtamasyz etýge, sondaı-aq pavlodarlyq bıznesmender men fermerlerge óz ónimderin satýǵa múmkindik beredi. Bizdiń tarapymyzdan «Shapaǵat» bazarynan jáne qaladaǵy basqa jerlerden saýda jasaıtyn oryndar bólemiz, al satylatyn ónimder baǵasy naryqtaǵydan arzan bolýy kerek. Mundaı jumysty basqa da aımaqtarmen júrgizemiz», - dedi Á. Jaqsybekov. Óz kezeginde Q. Bozymbaev Pavlodar oblysy aýyl sharýashylyǵy áleýeti zor óńir retinde tanymal bolyp otyrǵandyǵyn aıta kele, «Bıyl bizdiń aýyl sharýashylyǵy taýarlaryn óndirýshiler úshin tabysty bolyp otyr. Ásirese, kókónis ósirgen sharýalar mol ónim alýda. Búgingi is-sharanyń maqsaty - pavlodarlyq óńirdi jańa naryqqa shyǵarý», - dedi.
