Astana ákimdiginiń qurylymdary EQYU Sammıtin ótkizýge tolyq ázirligi týraly daıyndyq tólqujattaryn apta sońyna deıin alýy tıis
ASTANA. Qazannyń 28-i. QazAqparat /Gúlmıra Álıakparova/ - Osy aptanyń sońyna deıin Astana qalasy ákimdiginiń qurylymdary EQYU Sammıtin ótkizýge tolyq ázirligi týraly daıyndyq tólqujattaryn alýy tıis. Bul týraly búgin ótken baspasóz máslıhatynda elordalyq Týrızm jáne sport basqarmasynyń bastyǵy Aıtalap Qorǵanbaev málim etti.
A.Qorǵanbaevtyń aıtýynsha, daıyndyq kýálikterin Sammıtti ótkizýge jaýapty - Astana qalalyq Memlekettik sanıtarlyq epıdemıologııalyq qadaǵalaý departamenti, Kólik jáne avtomobıl joldary departamenti, Tótenshe jaǵdaılar departamenti men órtke qarsy qyzmetter, barlyq aýdan ákimdikteri, Týrızm jáne sport basqarmasy, Elordalyq týrızm qaýymdastyǵy, Memlekettik sáýlet-qurylys qadaǵalaý basqarmasy alýy tıis.
Basqarma bastyǵynyń sózine qaraǵanda, sheteldik qonaqtardy joǵary deńgeıde qarsy alý úshin budan bólek, árbir qonaqúıge, sammıtke qatysatyn árbir memleket pen olardan keletin delegatsııalarǵa jaýapty ákimdiktiń bir-bir qyzmetkeri bekitildi.
Aıta keteıik, Elordalyq týrızm qaýymdastyǵy «Brondaý jáne tirkeý», «Tamaqtandyrý salasyndaǵy servıs» jáne «Qonaqúı isi» baǵyttary boıynsha shet el tilderin tereńdetip oqytý kýrstaryn ótkizip, búgingi kúnge deıin 250 maman daıarlady. Odan bólek, aldaǵy 7-shi qysqy Azııa oıyndaryna tartylatyn eriktilerdiń arasynan tildi jetik meńgergen 120 jas iriktep alyndy. Olar 3 juldyzdy, 1 jáne 2-sanattaǵy qonaqúılerdegi tirkeý bólimine jumysqa tartylatyn bolady.
«Bul sharalarǵa qalalyq bıýdjetten barlyǵy 8 mln. teńge bólindi. Onyń 4 mln. - til úıretý kýrstaryna, 4 mln. - meımanhanalar qyzmetkerleriniń biliktiligin arttyrýǵa baǵyttaldy», - dedi A.Qorǵanbaev.
