Astana ákimdiginiń iKomek ortalyǵyna gepard jumysqa «ornalasty»
ASTANA. QazAqparat - Astana ákimdiginiń iKomek biryńǵaı baılanys ortalyǵynyń óz sımvoly paıda boldy. Ol - gepard beınesindegi mister Ikomek esimdi maskot, dep habarlaıdy QazAqparat.
Elorda ákimdiginen málim etkendeı, gepard mister Ikomek budan bylaı qala basshylyǵynyń barlyq áleýmettik jelilerdegi, telegramm kanaldaǵy akkaýntarynda jáne Astana ákimdiginiń resmı saıtynda shyǵyp turatyn bolady.
Biryńǵaı baılanys ortalyǵynyń sımvoly retinde nelikten gepard tańdalǵany da túsindirilip ótti.
«Sebebi, gepard Ikomek-tiń korporatıvtik qundylyǵyna naqty sıpattama beredi. Máselen, ol eń jyldam júgiretin ań - 3 sekýndta jyldamdyǵy 110 km/s quraıdy. Jyldam ba? Árıne, sóz joq! Gepard óte epti, kóz janary ótkir jáne qyraǵy. Dál osylaısha Astana da táýlik boıy (24/7) qalalyq beınebaqylaý júıesiniń arqasynda qaýipsizdikte tur. Qyzyl kitapqa engen. Ikomek ortalyǵy - Qazaqstannyń memlekettik qurylymynda eń biregeı jáne jalǵyz joba bolyp esepteledi. Túsine keletin bolsaq, qara-qyzǵylt: ashyq jáne ap-anyq, kózge birden túsedi. Mr. iKomek qala turǵyndaryna qyzmet etýge daıyn, www.astana.gov.kz ákimdiktiń saıtyna kirińizder de ózderińizdiń ótinishterińizdi qaldyryńyzdar!» - delingen iKomek qyzmetiniń resmı habarlamasynda.
Aıta keteıik, biryńǵaı front-ofıstiń basty maqsaty - turǵyndardyń máselesin 90% deıin qashyqtyqtan sheshý.
Ótinishti 109 nomerine habarlasyp qaldyrýǵa, Telegram (https://t.me/astanaikomek109_bot) chat-botyna hat joldaý, Astana ákimdiginiń saıtyna (www.astana.gov.kz) jazýǵa bolady. Sondaı-aq ótinish-tilekti áleýmettik jelide #astana109 heshtegimen qaldyrý múmkindigi bar.
