Astana ákimdiginiń basshylyǵy 10 kún boıy halyqqa esep beredi
ASTANA. QazAqparat - Astanada qala ákiminiń orynbasarlary men aýdandar ákimderi halyq aldynda esep beredi, dep habarlaıdy QazAqparat.
Elorda ákimdigi basshylyǵynyń turǵyndarmen kezdesýleri 21-31 qańtar aralyǵynda qalanyń ashyq alańdarynda ótedi.
«Turǵyndar sharaǵa óz nıetimen qatysyp, qalany damytýdyń barlyq baǵyttary boıynsha usynystary men keńesterin bildire alady. Halyq aldynda esepti Almaty, Baıqońyr, Esil jáne Saryarqa aýdandarynyń ákimderi beredi. Sonymen qatar, 11-15 aqpan aralyǵynda qala aktıvi elorda ákiminiń orynbasarlary: Sergeı Horoshýnnyń, Ermek Amanshaevtyń, Qosman Aıtmuhametovtyń, Asqar Ámrın men Malıka Bekturovanyń esebin tyńdaıdy», - delingen taratylǵan aqparatta.
Esep berý kezdesýleriniń kestesin Astana qalasy ákimdiginiń resmı saıtynan kórýge bolady.
