«Astana ákimdigindegi qyspaqtan adamdar qaza boldy» – aqparat feık
NUR-SULTAN. QazAqparat – Elorda ákimdigine kóptep jınalǵan adamdar arasynda qyspaq bolyp, saldarynan 4-qabattaǵy qorshaýlar syndy, adamdar tómen qulady. Osyndaı taqyryby jáne muqabasynda adamdar toby kórsetilgen vıdeo YouTube platformasynda taralyp jatyr, dep habarlaıdy QazAqparat.
Vıdeo áleýmettik jeliler men messendjerlerde 8 naýryz qarsańynda kópbalaly analarǵa áleýmettik kómek berý týraly jańalyqtar aıasynda tarady. Jaǵdaı Qazaqstan astanasynda bolǵan dep habarlandy. Alaıda, basqa qalalarda bolǵany týraly nusqalar da bar.
Factcheck.kz saıtynyń málimetinshe, bul vıdeo – feık.
«Bul vıdeo 2 naýryz kúni tańerteń Bolıvııadaǵy El Alto ýnıversıtetinde túsirilgen. Kem degende jeti stýdent temir qorshaý synǵannan keıin ýnıversıtet ǵımaratynyń tórtinshi qabatynan qulap, mert boldy, beseýi aýyr jaraqat aldy.
Vıdeoda stýdentterdiń tar dálizde syǵylysyp, májilis zalyna jınalysqa kirýge umtylǵany, sodan qorshaý shydamaı, synyp ketkeni kórinedi.
El Alto ýnıversıetiniń Twitter-degi resmı paraqshasynda JOO-nyń resmı málimdemesi jarııalandy.
Onda ýnıversıtet basshylyǵy 2 naýryz kúni tańerteń bolǵan osy oqıǵaǵa baılanysty qabyldanǵan sharalar týraly habarlaıdy. Atap aıtqanda, ýnıversıtet boıynsha 7 kúndik aza tutý jarııalanǵan. El-Alto memlekettik ýnıversıteti jaralanǵan jáne kóz jumǵan stýdentterdiń otbasylarymen baılanysta. Jaraqat alǵan ýnıversıtet stýdentterine medıtsınalyq qyzmet kórsetý shyǵyndary jáne qaıtys bolǵan stýdentterdi jerleý shyǵyndary óteledi.
«El-Alto memlekettik ýnıversıteti oqıǵany tergeýge qatysý úshin Zańdy dırektsııa arqyly Memlekettik mınıstrlikke shaǵym túsiredi. Ýnıversıtet basshylyǵy qaza tapqandardyń otbasyna qaıǵyryp kóńil aıtady», - delingen málimdemede.
«Al Qazaqstanda merekege oraı qarjylaı áleýmetik kómek kórsetile me?» degen saýalǵa kelsek, «Nur-Sultan qalasynyń áleýmettik kómek berý, olardyń mólsherin belgileý jáne jekelegen sanattar tizimin anyqtaý erejeleri týraly» zań boıynsha, ataýly jáne mereke kúnderi áleýmettik kómek qarastyrylǵan. Onyń mólsheri – 2,5 AEK. Bul – shynymen de, shamamen 17 dollar (7 myń teńgeden sál asady)», - dep jazady factcheck.kz saıty.
