Astana ákimdigin transformatsııalaýdyń ekinshi kezeńi bastaldy
ASTANA. QazAqparat - Búgin Baqyt Sultanovtyń tóraǵalyǵymen Astana ákimdigi apparatynyń kezekti otyrysy ótti, dep habarlaıdy QazAqparat elorda ákimdiginiń baspasóz qyzmetine silteme jasap.
Otyrysta qala ákimdigin transformatsııalaýdyń ekinshi kezeńi talqylandy.
«Keshe ótken Parlament Májilisiniń plenarlyq otyrysynda Elbasy búgingi áleýmettik-ekonomıkalyq jaǵdaı men syrtqy saıası ahýaldy eskere otyryp, birqatar basty baǵyttardy aıqyndap berdi. Onyń ishinde Elbasy, halyqtyń jaǵdaıyn kóterip, azamattardy áleýmettik qoldaý men ıdeologııalyq jumysty kúsheıtý jónindegi birqatar tapsyrmalar berdi. Bul qala ákimdiginiń qurylymyn ózgertip, keshendi jumys jasaýdy talap etedi. Osyǵan qaraı, Astana ákimdigin transformatsııalaýdyń ekinshi kezeńin jarııalaýdyń kezi kelip otyr», - dedi B. Sultanov otyrysta.
Onyń aıtýynsha, transformatsııalaýdyń birinshi kezeńi ekonomıkalyq tıimdilikti, memlekettik apparat jumysynyń sapasy men jedeldigin arttyrýǵa óz septigin tıgizdi. 2018 jyly transformatsııalaý men jańa tásildemelerdi engizýdiń arqasynda Astana ákimdigi 27, 6 mlrd teńgeni únemdedi. Ekinshi kezeńde birqatar ózgeris oryn alady dep kútilýde.
Birinshiden, qazirgi qarjy, bıýdjettik jáne strategııalyq josparlaý basqarmalary jańa ekonomıka basqarmasy bolyp biriktirilip, qalamyzdyń strategııalyq damýy men basym sektorlardy damytý arqyly jańa ekonomıkany jasaqtaýǵa jaýap beretin bolady. Ekinshiden, Qalalyq ortany renovatsııalaý basqarmasy qurylady. Oǵan qurylys jáne turǵyn úı saıasaty, qalalyq ortany regeneratsııalaý, qorshaǵan ortany qorǵaý jáne tabıǵatty paıdalaný basqarmalary kiredi.
«Bul salada da óte mańyzdy mindetter tur. Jobalyq-baǵdar ádisin qoldaný arqyly áleýmettik nysandar men turǵyn úı qoryn salý, jobalyq basqarýdyń áleýetin paıdalana otyryp, ákimdiktiń tapsyrys berýshi retindegi rólin nyǵaıtý, barlyq múddeli taraptarmen tıimdi qarym-qatynas ornatý, smart-jobalardy iske asyrý qajet», - dedi qala ákimi.
Ol, sonymen qatar, keshendi jáne júıeli sheshimder arqyly bıýdjet qarajatyn tıimdi paıdalanýdy arttyrý kerektigin aıtty.
«Tabıǵatty paıdalaný salasynda qalany jasyldandyrý jumystaryn jańasha júrgizgen jón. Qalanyń landshaftyq dızaınyna baılanysty zamanaýı tendentsııalardy eskere otyryp, jańa erejeler jasaýdy tapsyramyn. Ekologııalyq qaýipsizdik salasynda uzaq merzimdi basymdyqtar negizinde álemdik tájirıbege súıene otyryp, jobalyq basqarý ádisterin engizý jáne qorshaǵan ortany qorǵaý tujyrymdamasyn daıyndaý qajet», - dedi B. Sultanov.
Úshinshiden, barlyq qoǵamdyq-ıdeologııalyq jumys qoǵamdyq damý basqarmasy arqyly uıymdastyrylady. Bul basqarmaǵa qoǵamdyq damý isteri, mádenıet jáne sport, tilderdi damytý jáne arxıv isi basqarmalary biriktiriledi.
«Úsh organnyń biri ıdeologııalyq blokqa enýi ekonomıkalyq tıimdilikpen qatar, ákimdiktiń atalǵan saladaǵy jumysyn jańa sapalyq deńgeıge shyǵarady. Bul ıdeologııalyq jumystar elordalyqtardyń mádenı deńgeıin kóterý jáne salaýatty ómir saltyn qalyptastyrý arqyly astanalyqtardyń sanasyn tıisinshe jańǵyrtýǵa múmkindik bereri sózsiz», - dedi qala basshysy.
Osyǵan baılanysty Baqyt Sultanov óziniń orynbasary Nurlan Nurkenovke ákimdiktiń ıdeologııalyq jáne áleýmettik jumystaryn jańǵyrtýdy, áleýmettik saladaǵy jumystardy jaqsartý arqyly jergilikti atqarýshy organdardyń oń ımıdjin qalyptastyrý baǵytynda jumys isteýdi júktedi. Odan bólek, ákimdikte jańadan tsıfrlandyrý jáne memlekettik qyzmet basqarmasy qurylady.
«Elbasynyń elimizdi álemniń eń ozyq otyz memleketiniń qataryna qosýǵa qatysty naqty tapsyrmasy bar ekenin jaqsy bilesizder. Bul tıisinshe jańa ınnovatsııalyq damý men jedel texnologııalyq ózgeristerdi talap etedi. Elordada aýqymdy «Smart Astana» jobasy iske asyrylýda. Qazir tujyrymdama bekitilgen. Bul, birinshiden, xalyqtyń jaǵdaıyn jaqsartýdy, qolaıly qyzmetterdi usynýdy kózdeıtin zamanaýı joba. Atalǵan salalardy tsıfrlandyrý eń áýeli eńbek ónimdiligin arttyrýǵa, qarapaıym xalyqqa jáne kásipkerlerge sapaly qyzmet kórsetýdi qamtamasyz etýge, jyldam ári qaýipsiz aqparat usynýǵa, derekterdi jınaqtaý, óńdeý, adam kapıtalyn damytý, ıaǵnı kreatıvti qoǵam qalyptastyrýǵa múmkindik beredi», - dep atap ótti B.Sultanov.
Osyǵan oraı, ákim barlyq orynbasarlaryna memlekettik organdardyń qyzmetin jan-jaqty zerdelep, ony jaqsartýǵa qatysty naqty usynystar engizýdi tapsyrdy.
