Astana ákimdigi jylýdyń qashan beriletinin habarlady

ASTANA. QazAqparat - Astana ákimdiginde elordada 2018-2019 jylǵy jylytý maýsymyna daıyndyqtyń qalaı júrgizilip jatqanyn málim etildi, dep habarlaıdy QazAqparat tilshisi.

«Qazirgi ýaqytta Astana qalasy energııa kesheniniń 2018-2019 jyldarǵy jylytý maýsymyna daıyndyǵy josparǵa sáıkes júrgizilýde. Otyn qory: kómir - 238 714 tonna, sonyń ishinde: 1-JEO-da - 27 842 tonna jáne 2-JEO-da - 210 872 tonna. Mazýt - 6 106 tonna», - dep habarlady qala ákiminiń baspasóz hatshysy Elvıra Júrgenbaeva.

2018 jylǵy 3 qyrkúıektegi jaǵdaı boıynsha nysandardyń daıyndyǵy:

Turǵyn úı qory - 93,6 paıyz (2 414 úıdiń 2 261 úıi daıyn);

Densaýlyq saqtaý nysandary - 94,4 paıyz (36 nysannyń 34-i);

Bilim berý nysandary - 98,8 paıyz (168 nysannyń 166-y);

Mádenıet nysandary - 100 paıyz (13 nysannyń 13-i).

«QR Jergilikti memlekettik basqarý jáne ózin-ózi basqarý týraly» zańǵa, sondaı-aq Astana qalasy máslıhatynyń sheshimimen bekitilgen Astana qalasynda jylytý maýsymyna daıyndyq jáne ony ótkizý qaǵıdasyna sáıkes, bes táýlik boıy aýanyń ortasha táýliktik temperatýrasy +10°S jáne odan da tómen bolǵan jaǵdaıda qalalyq jergilikti atqarýshy organynyń jylý berý maýsymyn bastaý jóninde sheshimi qabyldanady», - deıdi Elvıra Júrgenbaeva.