Astana ákimdigi jumysqa ornalastyrý boıynsha jańa saıt ashty
ASTANA. 9 qańtar. QazAqparat - Búgin Astana ákimdigi qala turǵyndaryna bos jumys oryndaryn, al jumys berýshilerge qajetti mamandardy tabýǵa múmkindik beretin jańa portal ashty, dep habarlaıdy elorda ákimidiginiń baspasóz qyzmeti.
Azamattar www.job.astana.kz saıtynda Astana kásiporyndaryndaǵy bos jumys oryndary týraly málimetterdi alyp, ózderiniń túıindemelerin ornalastyra alady.
Sonymen birge, atalmysh saıttyń qyzmeti qyzmetkerlerdi izdep júrgen jumys berýshiler úshin de óte yńǵaıly. Barlyq anketalar ashyq túrde jarııalanady. Saıt jasaýshylardyń oıynsha, bul - qaladaǵy jumyssyzdyq máselesin sheshýge múmkindik bermek. Bos oryndar jáne jumys izdeýshiler týraly málimetti ornalastyrý tegin júrgiziledi.
Aıta keteıik, ınternetti meńgermegen jurtshylyq úshin ákimdik jumyssyzdyq máselesin sheshýge arnalǵan taǵy bir joldy usynady. Astanada 55-66-55 telefon nómiri boıynsha jumyspen qamtý boıynsha baılanys ortalyǵy jumys isteıdi. Bir jyl buryn ashylǵan ortalyqqa búgingi kúnge deıin 1 myńnan astam azamat habarlasqan.
