Astana ákimdigi jolaqy máselesi boıynsha turǵyndardy qoǵamdyq keńeske shaqyrdy
ASTANA. QazAqparat - Astana qalasynyń Qoǵamdyq keńesi avtomobıldi tasymal tarıfterine qatysty qoǵamdyq tyńdaýlar ótkizedi, dep habarlaıdy QazAqparat tilshisi qala ákimdigine silteme jasap.
Atalǵan jıyn 27 maýsym kúni 10.00-de qalalyq máslıhattyń májilis zalynda ótedi.
«Astana qalasynyń Qoǵamdyq Keńesi «Astana qalasy boıynsha qalalyq jáne qala mańy qatynastarynda jolaýshylar men bagajdy turaqty avtomobıl kóligimen tasymaldaý tarıfteriniń keıbir máseleleri týraly» taqyrybynda qoǵamdyq tyńdaý ótkizedi. Qoǵamdyq tyńdaýǵa qatysqysy keletin buqaralyq aqparat quraldary men turǵyndar 26 maýsym, saǵat 14.00-ge deıin tirkelýi tıis», - delingen Astana ákimdiginiń resmı habarlamasynda.
Aıta keteıik, Astana avtobýstaryndaǵy jolaqyny kóterý bastamasy mamyr aıynda kóterilgen bolatyn.
Atap aıtqanda, «Astra Plat» elektrondy tólem kartasy boıynsha jolaqy baǵasyn - 120 teńgege, al qolma-qol aqshamen 170-200 teńgege deıin arttyrý josparlanǵan.
«Jalpy, jol júrý baǵasyn kóterýdiń basty faktory dızeldik otyn baǵasynyń 40 paıyzǵa, qajetti qural-jabdyqtardyń baǵasy 2014 jylmen salystyrǵanda 1,5-2 esege (sol kezde baǵa 90 teńge bolyp bekitilgen) qymbattaýy bolyp otyr. Buǵan qosa avtobýs parkteri qyzmetkerleriniń aılyq tólemaqy deńgeıin arttyrý qajettiliginiń de áseri bar. Qazirgi tarıf boıynsha ony júzege asyrý múmkin emes», - deıdi «Astana LRT» basshysy Bekmyrza Igenberdınov.
