Astana ákimdigi jol qaýipsizdigin qamtamasyz etýge baǵyttalǵan aımaqtyq baǵdarlamany da qabyldaı almaı otyr - prokýratýra
ASTANA. 19-shy qazan. QazAqparat /Aıdar Ospanalıev/ - «Elordada bıylǵy jyly kólikterdiń jaıaý júrginshilerdi qaǵyp ketý jaǵdaılary 166 ret oryn alǵan. Al qala ákimdigi jol qaýipsizdigin qamtamasyz etýge baǵyttalǵan aımaqtyq baǵdarlamany da qabyldaı almaı otyr»,-
deıdi Astana qalalyq prokýratýrasynyń Áleýmettik, ekonomıkalyq saladaǵy zańdylyqtardy qadaǵalaý basqarmasynyń prokýrory Sabyrjan Ońalbaev. Bul týraly ol búgin jýrnalıstermen bolǵan brıfıngte málim etti.
Prokýrordyń málimetterine júginsek, Qazaqstan Respýblıkasynyń «Jol qaýipsizdigi týraly» zańyna sáıkes, qala ákimdigi jol-kólik oqıǵalarynyń aldyn alý men jaıaý júrginshilerdiń jáne kólikterdiń qaýipsizdigin qamtamasyz etý sharalaryn úılestirip otyratyn aımaqtyq baǵdarlama qabyldaýy qajet bolatyn. Ókinishke oraı, qala ákimdigi atalmysh qujatty bekitý bylaı tursyn, ony tipti daıyndamaǵan da. «Osy rette aıta ketetin másele baǵdarlamalyq-maqsatty qujattar negizinde júzege asyrylmaǵan jol qaýipsizdigin qamtamasyz etý júıesi keshendi túrde júrgizilmegen bolyp esepteledi. Onyń ústine bul jaǵdaı ári jergilikti atqarýshy organ qyzmetiniń is-áreketterin úılestiretin tıimdi tetikterdiń joqtyǵyn kórsetedi. Sóıtip ol Avtomobıl joldary men jolaýshylar kóligi basqarmasynyń qyzmetin joqqa shyǵarady», - deıdi S.Ońalbaev.
Onyń aıtýynsha, kez-kelgen ujymnyń qyzmeti ony josparlaýdan bastalady. Al Jol qozǵalysyn uıymdastyrý bólimi jumystarynyń jospary formaldy túrde jasalǵan. Onda tek jolaýshylardy tasymaldaý salasyndaǵy memlekettik satyp alýlar men jol belgilerin salý sııaqty máseleler ǵana qamtylǵan. «Al qala joldarynyń problemalyq ýchaskelerin belgileý, jol polıtsııasy men kóliktik baqylaý salasymen júrgiziletin jumystar nazardan tys qalǵan», - dedi prokýror.
