Astana ákimdigi jer ýchaskeleri berilip jatqany týraly aqparatty joqqa shyǵardy
ASTANA. QazAqparat - Astanada kópbalaly otbasylarǵa jer ýchaskeleri berilip jatqany jaıly áleýmettik jelide taraǵan aqparat shyndyqqa sáıkes kelmeıdi. Bul týraly óziniń Feısbýk paraqshasynda qala ákiminiń baspasóz hatshysy Elvıra Júrgenbaeva jazdy, dep habarlaıdy QazAqparat tilshisi.
«Áleýmettik jeliler men messendjerlerde kópbalaly otbasylarǵa arnap, az qabatty úı qurylysyn júrgizý úshin Astana ákimi Áset Isekeshevtiń jer ýchaskelerin berip jatqany týraly vırýsty aqparat tarap jatyr. Atalǵan usynys elordalyq bılikke azamattardy qabyldaý kezinde túsken bolatyn. Qazirgi ýaqytta ol - usynys memlekettik organdar tarapynan talqylanýda», - dep jazady Júrgenbaeva.
Elorda ákimdigi halyqty tek ortalyq memlekettik organdardyń resmı aqparat kózderine súıenýge shaqyrdy.
«Kópbalaly otbasylarǵa turǵyn úı kezegine turýdyń eki joly bar: jergilikti atqarýshy organǵa qujat tapsyrý (ákimdiktiń janyndaǵy turǵyn úı qatynastary bólimine nemese turǵyn úı basqarmasyna) nemese elektrondy úkimet portaly arqyly. Qala ákimdigi azamattardy áleýmettik jelide taraǵan mundaı aqparattarǵa, sonymen birge «feıkti» aqparattardyń taratylýynyń quqyqqa qarsy jaǵdaılaryna jiti nazar aýdaryp, ol týraly qalalyq ákimdikke nemese quqyq qorǵaý organdaryna habar berýge shaqyrady», - delingen jazbada.
Foto: dealertalk.ca
