Astana ákimdigi jar salǵan 10 týrıstik jobanyń qazirgi kúıi qandaı

NUR-SULTAN. QazAqparat – 2018 jyly Nur-Sultan qalasynyń ákimdigi 2025 jylǵa deıin elordaǵa týrısterdi kóptep tartatyn 10 jobany iske asyratynyn jarııalaǵan bolatyn. Arada ótken 4 jyldyń ishinde sol 10 jobanyń tek bireýiniń ǵana syzbasy daıyndalǵan, dep habarlaıdy QazAqparat tilshisi.

Áńgime «Bozoq» ulttyq parki týraly bolyp otyr.

QazAqparattyń saýalyna joldaǵan jaýapta qalalyq sáýlet, qala qurylysy jáne jer qatynastary basqarmasy atalǵan nysannyń Esil aýdanyna qarasty Ilınka turǵyn úı massıviniń soltústik jaǵynda boı kóteretinin jetkizgen.

Jobanyń birinshi kezeńdegi syzbasy mamyr aıynda bekitilipti. Qurylys túsetin alańnyń jalpy aýdany 2 myń sharshy metrge jýyq.

Basqarma mamandary saýalda aty atalǵan qalǵan nysandar týraly qandaı da bir málimet usynbady. Sonyń biri - 300 adamǵa shaqtalǵan planetarıı qurylysy bolatyn.

«Jalpy 2025 jylǵa deıin astanaǵa keletin týrısterdiń sanyn 800 myńnan asyrý josparlanǵan. QR Úkimetiniń 2021 jyldyń 12 qazanyndaǵy №728 qaýlysymen bekitilgen Kásipkerlik damytýdyń ultty jobasy aıasynda ishki jáne syrttan keletin týrısterdiń sanyn arttyrý kózdelgen. Nur-Sultan qalasy úshin 2025 jylǵa deıin ishki týrısterdiń sanyn 587 myńǵa, syrttan keletin týrısterdiń sanyn 263,48 myńǵa jetkizý mejesi qoıylyp otyr. Búgingi tańda osy kórsetkishke qol jetkizý úshin týrıst tartý jumystary júrip jatyr», - dep jazylǵan jaýapta.

Buǵan deıin atalǵan «Bozoq» ulttyq parkin salýǵa taǵy 46 mln teńge qajettigi habarlanǵan edi.

Foto: www.facebook.com/Gharysh