Astana ákimdigi zeınetkerler men múgedekterge kómir satyp alýǵa 20,9 mln teńge bóldi

ASTANA. QazAqparat - Bıyl elorda ákimdigi zeınetkerler men múgedekterge kómir satyp alý úshin birrettik járdemaqy tóleýge bıýdjetten 20,9 mln teńge bólip otyr. Bul týraly Astana qalasynyń jumyspen qamtý jáne áleýmettik qorǵaý basqarmasy «Saryarqa» aýdany boıynsha áleýmettik járdemaqylardy taǵaıyndaý bóliminiń basshysy Saltanat Stambaeva málim etti, dep habarlaıdy «QazAqparat» HAA tilshisi.

«Búgingi tańda áleýmettik kómek kórsetýdiń kólemin belgileý jáne keıbir azamattardyń kategorııasyn anyqtaý erejesine sáıkes, kómirdi satyp alý boıynsha áleýmettik kómek kárilik jasyna baılanysty zeınetkerlerge jáne múgedekterge ǵana beriledi. Al kópbalaly otbasylarǵa jeńildikter qarastyrylmaǵan. Áleýmettik kómek kórsetý erejelerine sáıkes, jer úıde turatyn zeınetkerlerge járdemaqy beriledi. Zeınetkerdiń óz atynda úı bolsa jáne basqa qalada ekinshi úıi bolmaǵan jaǵdaıda, sondaı-aq otbasyna shaqqandaǵy tabysy eń tómengi kúnkóris deńgeıiniń úsh eselengen kóleminen aspasa (otbasynyń tabysy 82 548 teńgeden az bolsa), kómirdi satyp alýǵa kómek kórsetiledi. Áleýmettik kómektiń mólsheri 18 152 teńgeni quraıdy. ıAǵnı, bul erejege sáıkes, kórsetiletin áleýmettik kómektiń mólsheri 8 AEK-ten aspaýy kerek. Áleýmettik kómek 15 qazannan 15 sáýir aralyǵynda birrettik tártippen ǵana beriledi», - deıdi Saltanat Stambaeva.

Onyń aıýynsha, dál osyndaı kómek úsh toptyń múgedekterine de qarastyrylǵan. Demek, bir otbasyda bir múgedek adam bolsa, ol mekenjaı anyqtamasy arqyly járdemaqyǵa ótinim beredi. Eger áleýmettik kómek alatyndar bireýdiń úıin jaldap turyp jatsa, ol úı ıesimen otyrǵan kelisimshart arqyly ákimdikke ótinim bere alady.

«Atalǵan eki topqa kómir satyp alý boıynsha kómek kórsetý úshin jergilikti bıýdjetten 20 mln 900 myń teńge bólinip otyr», - dep túıdi Saltanat Stambaeva.