Astana ákimdigi «Úzdik áleýmettik seriktes» ataǵyna laıyqtylardy izdestiredi
ASTANA. 14 qarasha. QazAqparat - Astana qalasynyń ákimdigi «Úzdik áleýmettik seriktes» ataǵy baıqaýyn ótkizedi.
Elordanyń resmı saıtynyń málimetinshe, baıqaý áleýmettik jáne eńbek qatynastaryn retteýdiń tıimdi tetikterin qurý, áleýmettik turaqtylyqty qamtamasyz etýge járdemdesý, jumys berýshilerdiń korporatıvtik áleýmettik jaýapkershilik ustanymdaryn qalyptastyrý men jetildirý, halyqty áleýmettik qorǵaý salasyndaǵy eń ozyq tájirıbeni engizýdi yntalandyrý maqsatynda uıymdastyrylýda.
Baıqaýǵa Astana qalasynyń barlyq menshik túrindegi uıymdary qatysa alady.
Jeńimpazdar «Elordanyń úzdik jumys berýshisi», «Jumyssyz azamattardy daıarlaýdy, qaıta daıarlaýdy jáne biliktiligin arttyrýdy júrgizetin úzdik bilim berý uıymy» atalymdary boıynsha anyqtalady.
Ótinimderdi qabyldaý Astana qalasy Jumyspen qamtý jáne áleýmettik baǵdarlamalar basqarmasynda júzege asyrylady.
