Astana ákimdigi ústimizdegi jyly balabaqshalarǵa joldamalardy úlestirý merzimi ózgertilgenin habarlaıdy
ASTANA. Naýryzdyń 30-y. QazAqparat - Astana qalasynda balabaqshalarda toptardy jasaqtaý merzimi ózgertildi. Bıyl mektepke deıingi mekemelerge joldamalardy úlestirý ádettegideı, maýsym aıynda emes, sáýirdiń 1-i men 30-y aralyǵynda júzege asyrylatyn bolady,
dep habarlaıdy QazAqparat ákimdiktiń baspasóz qyzmetine silteme jasap.
Astana qalasy ákimdiginiń baspasóz qyzmetinen málim etkendeı, toptardy jasaqtaý merziminiń ózgerýi, mektepke deıingi bilim berýdiń memlekettik júıesine Qazaqstan Prezıdenti N.Nazarbaevtyń tapsyrmasyna sáıkes 12 balabaqshanyń qaıtarylýymen baılanysty bolyp otyr. Olardyń biri - sanatorlyq tıpte. Onda balalardy bólýdi týberkýlezge qarsy dıspanser júzege asyratyn bolady. Balabaqshalarǵa japsarlas salynyp jatqan eki nysandy aldaǵy qyrkúıek aıynda paıdalanýǵa berý josparlanýda.
Osylaısha, ústimizdegi jyly barlyǵy 3719 joldama úlestiriledi. Olardyń ishinde 2120 oryn - jańadan ashylǵan nysandardan beriledi, 1599-y - jospar boıynsha bosaǵandar.
Joldamalardy úlestirý úshin ákimdiktiń janynan quramyna qalalyq máslıhat depýtattary, «Nur Otan» HDP, Bilim basqarmasy men ata-analar keńesiniń ókilderi engen jumys toby quryldy. Jumys tobynyń otyrysy senbi jáne jeksenbi kúnderden basqa, kúndelikti saǵat 10.00-den 18.00-ge deıin Konstıtýtsııa kóshesi, 44-shi úıde ornalasqan №26 orta mektep ǵımaratynda ótedi.
Túsinispeýshilikter men qajetsiz kezekterdi boldyrmas úshin balalarǵa oryndardy úlestirý kestesi jasaldy: Máselen, 2008 jyly týylǵan balalar úshin qabyldaý - sáýirdiń 1,2 jáne 5 kúnderi; 2007 jylǵylar úshin - 6,7 jáne 8-i kúnderi; 2006 jylǵylar úshin - 9,12 jáne 13-i; 2005 jylǵylardy qabyldaý - 14,15 jáne 16 kúnderi; 2004 jylǵy balalary bar ata-analar - 19, 20 jáne 21-i kúnderi kelýi tıis. Sáýirdiń 22-29 kúnderi aralyǵynda qabyldanǵan qujattardy qaraý júredi.
Qosymsha aqparattardy elorda ákimdiginiń resmı saıtynan alýǵa bolady (www.astana.kz ).
