Astana ákimdigi úleskerlik qurylystyń problemalyq nysandaryn baqylaýda ustaýda - Á.Jaqsybekov

ASTANA. QazAqparat - Astana ákimdiginde apta saıyn turǵyn úı qurylysyndaǵy úleskerlik qatysý máseleleri boıynsha vedomstvoaralyq komıssııasy otyrysy ótkizilýde, dep habarlady elorda ákimi Ádilbek Jaqsybekov.

egov.kz portalyndaǵy ınternet-konferentsııa barysynda Astana ákimine qurylysy sozylyp ketken «Shyǵys» TK jóninde kóptegen ótinishter tústi. Ony «KaontechInternational» JShS salýda.

Úleskerler qala ákiminiń jaǵdaıdy tikeleı baqylaýyna alyp, qurylys kompanııasyn adal emes qurylysshylar tizimine qosýdy ótindi. Ózderiniń aqshalaryn úleske salǵan azamattar bul keshen qashan beriletinine alańdaýly.

«Búgingi kúni «Shyǵys» TK №16, 16/1 úıleriniń 1-shi kezegindegi 1B toby memlekettik qabyldaý komıssııasynyń aktisimen paıdalanýǵa berildi. «Shyǵys» TK qalǵan bóliginiń aıaqtalýyna qatysty qazirgi kezde apta saıyn vedomstvoaralyq komıssııada nysan qurylysynyń aıaqtalýy máselesi qaralýda. Otyrysta qurylysty aıaqtaý úshin qolǵa alynyp jatqan sharalar týraly aqparat tyńdalýda. Bul másele ákimdiktiń turaqty baqylaýynda», - delingen jaýapta.

Qurylys salýshy úlestik qurylys qatysýshylarynyń aqshasyn tartý esebinen turǵyn úı qurylysyn uıymdastyrý qyzmetine lıtsenzııa alýǵa ótinish bermegeni atap ótildi.

«Astana qalasynyń ákimdigi azamattyq-quqyqtyq qatynastar sharty taraby bolyp tabylady, sondaı-aq nysandardy bıýdjet qarajaty esebinen aıaqtaý múmkindigin qarastyrmaıdy», - dep habarlady Á.Jaqsybekov.

Qala basshysy ózderiniń quqyqtaryn sot arqyly qorǵaýǵa nemese quqyq qorǵaý organdaryna júginýge keńes berdi.

Suraqtarǵa jaýaptardan belgili bolǵandaı, Astana ákimdigi sondaı-aq «Terrıtorııa komforta-1», «Jeti jol», «Jaǵalaý», «Azbýka jılıa» turǵyn úı keshenderiniń úlestik qurylystary problemalyq nysandaryndaǵy jaǵdaıdy baqylaýda.

«Terrıtorııa komforta-1» TK úleskerlerine jańa ınvestor - «ISK ASI» JShS-ny usyndy, ol eger úleskerler «Terrıtorııa komforta-1» TK ornalasqan №34 kóshedegi jer teliminiń bir bóligine menshik quqyǵyn bergen jaǵdaıda barlyq úleskerlerdi (sonyń ishinde 285-i - «1-Astana» TK turǵyn úı-kooperatıviniń múshelerin) pátermen qamtamasyz etýge ázir Búgingi kúni «Terrıtorııa komforta-1» TK úleskerlik qurylylysy qatysýshylarynan 170 ótinish tirkeldi, olar jańa ınvestorǵa kóshýge tilek bildirdi. Ekinshi «Jaǵalaý» TK TQK quryldy», - dep túsinik berilgen jaýapta.

«Jeti jol» TK boıynsha, jańa ınvestor tartý máselesi qaralýda. «Azbýka jılıa» kompanııalar tobyna qatysty qylmystyq is tergelýde.