Astana ákimdigi úleskerler máselesin jyldyń sońyna deıin sheshýi múmkin
ASTANA. 25 qyrkúıek. QazAqparat - Astana qalasynyń ákimdigi aǵymdaǵy jyldyń aıaǵyna deıin úleskerler máselesin sheshpek.
Bul týraly Astanada qalalyq máslıhattyń kezekti sessııasy barysynda elordadaǵy turǵyn úı qurylysynyń jaı-kúıi men ony damytý bolashaǵy týraly máseleni talqylaý barysynda qala ákiminiń birinshi orynbasary Sergeı Horoshýn málim etti.
Ákim orynbasarynyń aıtýynsha, búgingi kúni elordada úlestik qurylys arqyly salynyp jatqan 2 «saqaldy» nysan bar. Onyń biri - «Terrıtorııa komforta-1», ekinshisi «Monblan»turǵyn úı keshenderi.
«Atap aıtar bolsaq, «Monblan» nysany negizinen «BTA» bank arqyly qarjylandyrylǵan. Atalǵan bank onyń qunynyń úshten eki bóligin - shamamen 2 mlrd. teńge kóleminde qarjylandyrypty. Endi 900 mln. teńgege jýyq qarjylandyrýdy qajet etedi. Qazirgi tańda nysanda aýdıt jumystary júrgizilýde», - dedi S. Horoshýn. Onyń aıtýynsha, bank basshylyǵynyń ótinishimen osy aıdyń sońyna deıin másele sheshiledi, sosyn qarjylandyrý ashylady.
Al «Terrıtorııa komforta-1» turǵyn úı-keshenine kelsek, qurylysty aıaqtaýdyń birneshe joly, sonyń ishinde ınvestorlardy tartý qarastyrylǵan.
«Ókinishke qaraı, nysannyń qazirgi jaǵdaıy atalǵan obektini zertteýge baılanysty qosymsha shara qabyldaýdy qajet etedi. Óıtkeni, tekserý barysynda qurylys normalary men erejeleriniń óreskel buzylǵany anyqtalǵan. Tekserý jumystaryna baılanysty sharalar aıaqtalǵan soń sol máseleni sheshýge kirisemiz», - dedi S. Horoshýn.
