Astana ákimdigi Uber kompanııasymen memorandým jasasty
ASTANA. QazAqparat - Astana qalasynyń ákimdigi, QR Qarjy mınıstrligi Memlekettik kirister komıteti jáne Uber kompanııasy yntymaqtastyq týraly úshjaqty memorandýmǵa qol qoıdy. Álemniń 70-ten astam memleketinde qyzmet kórsetetin halyqaralyq kompanııa qazaqstandyq naryqqa elordadan bastap kirmek.
Ákimdikten habarlaǵandaı, Memorandýmǵa sáıkes, Uber tek kásipkerlik qyzmet sýbektileri retinde tirkelgen Seriktestermen (zańdy tulǵalarmen jáne jeke kásipkerlermen) ǵana jumys isteıdi. Avtomattandyrylǵan esep aıyrysý júıesi men zańdy qyzmetiniń arqasynda Uber qazaqstandyq naryqta servıs seriktesteri-júrgizýshilerdiń kirisiniń aıqyn bolýyna jáne salyqtardyń bıýdjetke tolyq tólenýine jaǵdaı jasaıdy.
«Árıne, bul - biz úshin aıtýly oqıǵa. Uber kompanııasymen kópten beri kelissózder júrgizip kelemiz, onyń Qazaqstan naryǵyna osy Astanadan bastap kiretinine qýanyshtymyz. Júıeniń aıqyndylyǵynyń arqasynda shaǵyn jáne orta bıznesti damytýǵa qosymsha múmkindikter ashylyp, memlekettik bıýdjetke túsetin túsimder ulǵaıady, al eń mańyzdysy, naryqta taǵy da bir álemdik brend bolady», - dedi Astana qalasy ákiminiń orynbasary Malıka Bekturova. Onyń aıtýynsha, jolaýshylar tasymaly naryǵyna jańa kompanııanyń enýi elordalyq bıznestiń damýyna úlken serpin bermek.
Uber - paıdalanýshylar men júrgizýshi-seriktesterdi baılanystyratyn tehnologııalyq platforma. Mobıldi qosymsha arqyly tapsyrys berýshi júrgizýshi men mashınaǵa rezerv qoıyp, onyń belgilengen jerge deıingi qozǵalysyn baqylaı alady, tólem banktik kartamen jasalady. Uber qoldanystaǵy qarapaıymdylyǵymen, qaýipsizdik talaptarynyń joǵary bolýymen, sondaı-aq, qolma-qol aqshalaı tólemderdiń joqtyǵymen tanymal. QR Qarjy mınıstrligi Memlekettik kirister komıtetiniń tóraǵasy Dáýlet Erǵojınniń atap ótýinshe, naq osy qolma-qol aqshasyz esep aıyrysý salyq túsimderiniń ulǵaıýyna yqpal etedi.
Uber B.V. TMD memleketteri boıynsha bas menedjeri Alekseı Stahtyń atap ótýinshe, kompanııanyń jobany Astanada damytý perspektıvalary zor.
«Úlken perspektıvalar bar. Startap asa qarqyndy damyp keledi, biz álemniń 70 memleketinde 400 astam qalada jumys isteımiz. Qazaqstanǵa kelip, elordadan bastaıtynymyzǵa qýanyshtymyz. Biz úshin bul óte mańyzdy. Búgingi tańda bıliktiń qazirgi salany jaqsartýǵa múmkindik beretin ınnovatsııalardy qoldaıtynyn kórip júrmiz. Óz tarapymyzdan qazaqstandyqtar kútken servısti usynýǵa barlyq sharalardy qabyldaıtyn bolamyz», - dedi A. Stah.
M. Bekturovanyń aıtýynsha, elorda ákimdigi qala turǵyndary men qonaqtaryna jaılylyq pen qyzmetiniń zańdylyǵyn qamtamasyz etetin, damytylyp jatqan basqa da jobalar boıynsha yntymaqtastyq ornatýǵa daıyn.
