Astana ákimdigi turmys qaldyqtaryn ýaqytyly shyǵarylmaýy týraly qaýesetti joqqa shyǵardy
ASTANA. QazAqparat - Áleýmettik jelilerdi paıdalanýshylar Facebook paraqshasynda Astana aýmaǵynda qatty turmystyq qaldyqtardyń ýaqytyly shyǵarylmaıtyndyǵy jóninde jalǵan aqparat taratqan, dep habarlaıdy QazAqparat Astana qalasy ákimdiginiń saıtyna silteme jasap.
Astana qalasynyń ákimi Áset Isekeshev turǵyndardyń synı pikirine tez arada nazar aýdaryp, fakt boıynsha tabıǵat resýrstary basqarmasy, Almaty aýdanynyń ákimdigi, qoǵam densaýlyǵyn baqylaý departamenti jáne tabıǵatty qorǵaý polıtsııasy ókilderinen quralǵan komıssııa qurdy.
Olar kórsetilgen meken jaıǵa baryp, tekserdi. Aýmaqty zertteý barysynda qoqystyń ýaqytyly shyǵarylmaıtyny týraly fakt dáleldenbegen. Komıssııa zertteý kezinde qoqys jáshikteriniń alańy kórsetilgen fotosýret bir apta buryn túsirilgeni belgili boldy.
Qatty qaldyqtardy shyǵarý boıynsha máseleniń joqtyǵy anyqtaldy. Bul aýmaqqa qoqys shyǵarýshy mekeme «Clean city NS» JShS jaýap beredi. Kásiporynǵa TQQ tazalaý jumystaryn kúsheıtý júkteldi. Buǵan qosa, qala basshysy ruqsat etilmegen jerlerde qoqys úıindileri paıda bolmas úshin baǵyttarǵa qaıta barýǵa qosymsha kezekshi qoqys shyǵaratyn kólikter uıymdastyrýdy talap etti.
Sonymen qatar, qaldyqtardy shyǵarýǵa jaýapty mekemelerge óz jumystaryn ońtaılandyrýdy, al ákimdikke baqylaýdy kúsheıtýdi tapsyrdy. Qala basshylyǵy turǵyndardy TQQ ýaqytyly shyǵarylmaǵan jaǵdaıda áleýmettik jelilerdegi Astana ákimdiginiń resmı saıttaryna habarlaýǵa shaqyrady.
Kúndelikti Astana qalasy aýmaǵyndaǵy qaldyqtardy jınaýǵa jetpis birlik qoqys shyǵaratyn kólik jáne 350 jumysker jumyldyrylǵan. Táýligine elordadan qalalyq polıgonǵa 1200 tonna qaldyq shyǵarylady.
