Astana ákimdigi turǵyndardy páter satyp alý kezinde saq bolýǵa shaqyrdy
ASTANA. QazAqparat - Astana qalasynyń ákimdigi qurylys salýshylar baspanany satýdy úleskerlerdiń qarajattaryn tartý úshin tıisti lıtsenzııasy nemese naqty bir nysandy salý úshin ekinshi deńgeıli bankterde ashylǵan 100% kredıttik jelisi bar bolǵan jaǵdaıda júzege asyra alatynyn habarlaıdy. Bul jaýapsyz qurylys salýshylardyń páterlerdi zańsyz satý faktilerine jol bermeý maqsatynda qolǵa alynyp otyr.
Qurylys salýshynyń qurylysty bastaý úshin tómendegideı qujattary bolýy tıis: - Nysan ornalasqan jer ýchaskesin ıelený quqyǵyn rastaıtyn qujattary (jeke menshik nemese ýaqytsha óteýli jer paıdalaný (jalǵa alý) quqyǵyna arnalǵan akti); - Ázirlengen jáne saraptamadan ótken ınjenerlik jelileri kórsetilgen jobalaý-smetalyq qujattamasy; - Ákimdiktiń qurylys jumystaryn júrgizýge ruqsat qaýlysy; - «Astana qalasynyń memlekettik sáýlet-qurylys baqylaý basqarmasy» MM (MSQQB) qurylys-montajdaý jumystaryn bastaý týraly habarlamasy.
Ruqsat berý qujattamalary týraly qajetti aqparatty Astana qalasy ákimdigi saıtynyń «Aqparattar bıýrosy» bóliminen alýǵa bolady, dep habarlaıdy elorda ákimdiginiń baspasóz qyzmetinen.
