Astana ákimdigi turǵyndardy baspanalaryn satýǵa quqyǵy joq qurylys kompanııalary týraly habardar etti

«Túsetin ótinishterge baılanysty Astana qalasynyń ákimdigi qala turǵyndaryna qazirgi ýaqytta «Al barakat kompanı» JShS Astana qalasyndaǵy qurylysy bastalmaǵan «Tengız», «Tokıo», «Shardja» jáne zańsyz qurylys júrgizý faktilerine tıisti qylmystyq is qozǵalýy sebepti qurylys jumystary toqtatylǵan «Praga» turǵyn úı keshenderinde baspanalardy satýdy jalǵastyrýda ekenin habarlaıdy. Kompanııanyń atalǵan turǵyn úı keshenderiniń qurylysyn júrgizýge ruqsat qujattary joq («Praga» TÚK jáne basqa) jáne úleskerlerdiń qarjysyn tartýǵa jáne baspanalardy satýǵa quqyq beretin lıtsenzııasy joq», dep habarlaıdy astana.gov.kz . Qazirgi ýaqytta «Tólendi» TÚK («AqmolJylýServıs» JShS) «Anısa» TÚK, «Anısa 2», «Anısa 3», «Telman» TÚK, Tilendıev dańǵyly boıyndaǵy TÚK, «Stolıchnyı 2» TÚK jáne «Abat» TÚK nysandarynyń qurylysy ruqsat qujattarynyń bolmaýyna baılanysty toqtatylǵan (Memlekettik saraptamanyń qorytyndylary jáne qurylys júrgizýge qaýlynyń bolmaýy, «Stolıchnyı 2» TÚK-inen basqa). Sonymen qosa, bul kompanııanyń úleskerlerdiń qarjysyn tartýǵa lıtsenzııasy joq. Nysandar qurylysy ruqsat qujattary tolyq daıyn bolǵannan keıin qaıta júrgiziletin bolady. Al «Sozvezdıe» turǵyn úı keshenine qarajat salǵan ınvestorlardyń ótinishterine baılanysty bul nysandy salýshy «QazMunaıQurylysServısKZ» JShS bolyp tabylatynyn jáne turǵyn úı kesheniniń qurylysy ruqsat qujattarynsyz bastalǵanyn, baspanalardy satý úleskerlerdiń qarjysyn tartýǵa lıtsenzııasyz júzege asyrylǵanyn habarlaımyz», delingen ákimdik habarlamasynda. Bul derekter boıynsha aqparat Astana qalasy boıynsha memlekettik kirister departamentine QR zańnamasymen belgilengen tártipte sheshim qabyldaý úshin jiberildi. «Sonymen qatar «OralDızaınStroıServıs» JShS «Turǵyn úı qurylysyna úlestik qatysý týraly» zańǵa qaıshy «Krysha.kz» saıtynda habarlandyrý ornalastyrý arqyly turǵyn úılerdi zańsyz satýmen aınalysatynyn habarlaımyz. «OralDızaınStroıServıs» JShS ruqsat qujattarynsyz qosymsha birneshe qabatty óz betinshe salǵan. Qolda bar aqparatqa sáıkes, turýǵa jaramdy bos oryndar joq. Osyǵan oraı, «OralDızaınStroıServıs» JShS dırektory Q.Jumabekovqa qatysty alaıaqtyq faktisi boıynsha qylmystyq is qozǵaldy. Qazirgi ýaqytta turǵyn úıdiń qurylysy toqtatyldy. Tergeý jumystarynyń qorytyndysy negizinde qurylysty jalǵastyrý boıynsha sheshim qabyldanatyn bolady», delingen Astana qalasy ákimdiginiń málimetinde. Astana qalasynyń ákimdigi qala turǵyndaryna turǵyn úı alý kezinde QR Sáýlet, qala qurylysy jáne qurylys qyzmeti týraly zańyn jáne turǵyn úı qurylysyna úlestik qatysý týraly zańdy negizge ala otyryp, kelisimshart jasaýǵa keńes beredi. Turǵyndardan bul máselege qatysty barlyq suraqtar boıynsha ákimdiktiń «astana.kz» saıtyna habarlasýlary suralady.