Astana ákimdigi Taldykólge qatysty: Abattandyrýdan keıin jaǵymsyz ıis ketedi
NUR-SULTAN. QazAqparat – Elordadaǵy Taldykól tazartylyp, onda abattandyrý jumysy júrgiziledi. Bul týraly Nur-Sultan qalasy qorshaǵan ortany qorǵaý jáne tabıǵatty paıdalaný basqarmasynyń basshysy Álııa Qojabaeva málim etti, dep habarlaıdy, dep habarlaıdy QazAqparat tilshisi.
Búgin Nur-Sultan qalasynyń ákimdigi kópshilikti mazalap, jurtshylyqty tolǵandyrǵan Kishi Taldykól taǵdyryna qatysty resmı túsinikteme berip, máselege qatysty suraqtarǵa jaýap berdi.
Kól taǵdyryna jany ashyǵan elorda turǵyny «Kishi Taldykól mańynda jaǵymsyz ıis bar. Osy másele qalaı sheshilmek?», - degen saýal qoıdy.
Óz kezeginde qalalyq Qorshaǵan ortany qorǵaý jáne tabıǵatty paıdalaný basqarmasynyń basshysy Álııa Qojabaeva abattandyrý jumystarynan keıin kóldegi jaǵymsyz ıistiń joıylatynyn aıtyp sendirdi.
«Árıne, bul másele sheshiledi jáne biz kól men ony mekendeýshilerdiń kózin joımaımyz. Abattandyrý jumysynyń kól tirshiligine keri áser tımeıdi. Búginde elordada ýrbandalý qarqyny ekpin alyp keledi. Buǵan deıin aıtqanymdaı, kóldiń jaǵasynda qoryq aýmaǵy men saıabaq paıda bolady. Kól zııandy qaldyqtar men zattardan tazartylady. Sáıkesinshe ondaǵy jaǵymsyz ıis te ketedi», - dedi Álııa Qojabaeva elorda ákimdiginde ótken baspasóz máslıhatynda.
Onyń sózinshe, Kishi Taldykóldi saqtap qalýǵa qatysty - kúnine 1-2 ótinish, al ondaǵy jaǵymsyz ıis pen masa-keneniń kózin qurtýdy surap 22 ótinish keledi eken.
«Osy turǵyda másele ekijaqty. «SOS Malyı Taldykol» belsendileri kólge tıispeýdi surasa, onyń mańynda turatyn adamdar jaǵymsyz ıis pen masaǵa shydamaı, tazartý men abattandyrýdy dereý qolǵa alýdy ótinedi. Tazartý jáne abattandyrý sharalarynan soń jaǵymsyz ıistiń ketetini sózsiz», - deıdi ol.
Odan bólek, elorda ákimdiginiń ókili Taldykól tazartylǵan soń onda qurylys jumystary bastalatynyn aıtty.
