Astana ákimdigi sý tasqynyna qarsy keshendi jospar ázirledi
ASTANA. QazAqparat - Astanada sý tasqynynyń aldyn alý maqsatynda «2018 jyly elorda aýmaǵynda tasqyn sýlardy uıymdasqan túrde ótkizý boıynsha keshendi jospar» bekitilgen. Bul týraly dúısenbi kúni qala ákiminiń orynbasary Qosman Aıtmuhametov apparat jınalysynda málimdedi, dep habarlaıdy QazAqparat ákimdiktiń baspasóz qyzmetine silteme jasap.
Búgingi kúni Maıbalyq kóliniń mańyn, Qyzylsýat pen odan joǵary aýmaqtardy marshrýttyq tekserý boıynsha brıgada jumys isteýde.
«Onda kóp sý bolady dep kútilip otyrǵan joq. Qazirgi ýaqytta Maıbalyqta 20% syıymdylyq qory bar. Onda búgin 60 mıllıon tekshe metr sý bar. Jalpy syıymdylyǵy - 82-84 mıllıon tekshe metr», - dedi Qosman Aıtmuhametov.
Sondaı-aq atap ótilgendeı, Almaty jáne Saryarqa aýdandarynyń jeke sektorlaryn aralaý jumystary júrgizildi. Bul másele aýdan ákimdikteriniń nazarynda, jaǵdaı turaqty.
Ákim orynbasarynyń aıtýynsha, basty kóshelerdegi jaýyn sýlaryn aǵyzatyn káriz júıelerin ashý jumystary bastaldy.
