Astana ákimdigi sý alyp kete beretin Momyshuly kóshesi týraly: Máseleni sheshemiz
ASTANA. QazAqparat - Elorda ákimdigi Baýyrjan Momyshuly kóshesin qaıta-qaıta sý alyp ketý jaǵdaıyna ne sebep bolyp otyrǵanyn túsindirip berdi, dep habarlaıdy QazAqparat tilshisi.
«Qurylys aýmaǵy óte úlken. 1 000 jáne 12 00 mıllımetrlik úsh kollektormen sý tazartý qurylymyna keledi. Tazartý qurylymynyń aldynda barlyq aýdandaǵy sýdy qabyldap alatyn kamera bar. Osy kameradan tazartý qurylymyna deıin bizde 1 000 mıllımetrlik qubyr jatyr», - dedi qala ákiminiń orynbasary Qosman Aıtmuhametov OKQ-da ótken baspasóz máslıhatynda tilshilerdiń suraqtaryna jaýap bere otyryp.
Ol atalǵan ýchastoktaǵy sý irkýishtiń syzbasyn túsindirip berýge tyrysty.
«Mine, sý toly úsh qubyr ótedi. Biz qala boıynsha tolyqtaı ınpektsııa júrgizip, sý alyp ketý qaýpi bar oryndardy zerttedik. Máseleni anyqtadyq. Jobany bastaǵan kezde kollektor men kameranyń ózgergenine kózimiz jetti», - deıdi ákimdik ókili.
Salanyń qyr-syryn ońaı túsindirý úshin Qosman Aıtmuhametov salystyrmaly túrde mysal keltirdi.
«Eger rakovınaǵa shelekpen sýdy bir-aq quıyp jiberse, ol qubyr sýdy birden qabyldaı almaıdy. Bizde de sondaı jaǵdaı. 2019 jylǵa deıin barlyǵyn retke keltiremiz», - dep sendirdi ol.
Qala ákiminiń orynbasary sonymen birge Baraev pen Ýálıhanov kósheleri boıynsha tazartý qurylymdarynyń kúrdeli jóndeýi boıynsha jobalyq-smetalyq qujatty ázirleý jumysy aıaǵyna jetkenin málim etti.
«Búgin Premer-mınıstr ol nysan týraly sóz qozǵady. Biz osy rette sý jınaýshy toǵannan bastap kúrdeli jóndeý jumystaryn bastaımyz. Baraev kóshesinen bastap eki birdeı kollektor men tazartý qurylymy salynady. Aqbulaq boıynsha jobalyq-smetalyq qujat daıyn. Kelesi jyldyń sońyna qarı Áset Órentaıuly naqty tapsyrma berip otyr. Ol boıynsha Aqbulaq tazartý qurylymy men kollektor qurylysynyń kúrdeli jóndeýi aıaqtalýy kerek», - dedi Qosman Aıtmuhametov.
