Astana ákimdigi sportty damytýǵa qosymsha 15,9 mlrd teńge surap otyr

NUR-SULTAN. QazAqparat – Nur-Sultan qalasynda sportty sapaly ári kásibı túrde damytý úshin bıýdjetten qosymsha qarjy suralyp otyr. Bul týraly Nur-Sultan qalasy dene shynyqtyrý jáne sport basqarma basshysynyń orynbasary Almas Abaev málim etti, dep habarlaıdy QazAqparat tilshisi.

«Qala boıynsha bizdiń basqarmaǵa baǵynysty 17 sport mekemesi jumys isteıdi. Onyń ishinde 11-i - balalar men jasóspirimderge arnalǵan sport mektepteri. Sonymen qatar olımpıadalyq jáne olımpıadalyq emes sport túrleri boıynsha sport dırektsııalary, olımpıada rezervin daıarlaý ortalyǵy, «Dáýlet» sport kesheni jáne basqalar bar», - dedi Almas Abaev qalalyq máslıhattyń turaqty komıssııasynyń otyrysynda.

Onyń aıtýynsha, búginde elordada 13 041 sportshy bar.

«Bıyl 1 qańtardaǵy bekitilgen bıýdjetke sáıkes sportty damytýǵa 11,3 mlrd teńge qaralǵan. Onyń ishinde memlekettik sport tapsyrysyna - 1,3 mlrd teńge. Qalǵan soma basqarmaǵa baǵynysty mekemelerge taralǵan. Osy oraıda sportty sapaly ári kásibı túrde damyta túsý úshin qosymsha qarjy bólýdi suraımyz. Atap aıtqanda qalalyq, respýblıkalyq, halyqaralyq sport jarystaryna qatysý úshin jáne sportshylardyń daıyndyq bazasyn jetildire túsý úshin qosymsha qarajat kerek. Onymen qosa sportshylardyń jattyǵý zaldaryn tıisti qural-jabdyqpen qamtý máselesi kún tártibinde tur. Osyǵan oraı bıýdjetten qosymsha 15,9 mlrd teńge bólýdi suraımyz», -deıdi ol.