Astana ákimdigi Semeı polıgonynan zardap shekkenderge qarjylyq kómek kórsetpek

NUR-SULTAN. QazAqparat – Nur-Sultan qalasynyń ákimdigi Semeı polıgonynan zardap shekken azamattarǵa kómek kórsetý úshin qarjy bólýdi josparlap otyr. Bul jaıynda qalalyq Jumyspen qamtý jáne áleýmettik qorǵaý basqarmasy basshysynyń orynbasary Baqtııar Garıfýllın aıtty, dep habarlaıdy QazAqparat tilshisi.

«Máslıhat sheshiminiń jobasynda Semeı ıadrolyq synaq polıgonyndaǵy ıadrolyq synaqtar barysynda zardap shekken tulǵalarǵa ataýly datalarda 2,5 aılyq eseptik kórsetkish (1 AEK - 2917 teńge) mólsherinde áleýmettik kómek kórsetý kózdelgen. Bul sanatqa zeınetkerler men birrettik áleýmettik ótemaqy alýshylardy qosamyz», - dedi ol qalalyq qoǵamdyq keńes otyrysynda.

Onyń atap ótýinshe, atalǵan áleýmettik kómek júzege asqan jaǵdaıda qala bıýdjetinen 6,4 mln teńge qajet bolady.

«Bul másele boıynsha bizge Semeıde zardap shekkender qoǵamyna kiretin qoǵamdyq birlestikten júgindi. Sondyqtan bul is-sharany qoǵamdyq keńes talqylaýyna shyǵaryp otyrmyz», - dedi Baqtııar Garıfýllın.