Astana ákimdigi saılaýshylar tizimin anyqtaý úshin úılerdi aralaý naýqanyna qala turǵyndaryn túsinistikpen qaraýǵa shaqyrady
ASTANA. QazAqparat - Astanada saılaýshylar tizimin anyqtaý maqsatynda úılerdi aralaý naýqany júrip jatyr, dep habarlady Astana qalasy ákimdiginiń baspasóz qyzmetinen.
QR Prezıdentin saılaý naýqanyna daıyndyq jumystary aıasynda Astana qalasynyń aýdan ákimderi apparattarynyń uıymdastyrýymen saılaýshylar tizimin anyqtaý úshin saılaý komıssııasynyń ókilderi jáne ýchaskelik ınspektorlardyń qatysýymen kúndelikti turǵyn úılerdi aralaý sharalary júrgizilýde. Páterlerdi aralaý sharasy 11-naýryzda bastaldy jáne arnaıy top quramynda volonterlar men ІІB ýchaskelik ınspektorlary bar, olarda aty-jóni men aýdan ákimi apparatynyń móri basylǵan arnaıy beıdj bolady. «Saryarqa» aýdany boıynsha bul jumysqa 287 stýdent jáne 40 oqytýshy, sonymen qatar, ІІB 89 qyzmetkeri tartyldy. Olar osy ýaqytqa deıin 20 myńnan astam páter men 3116 jekemenshik turǵyn úıdi aralap úlgerdi. «Almaty» aýdanynda atalǵan sharaǵa 287 volonter men 125 ınspektor atsalysýda. Búgingi kúnge deıin olar 50310 páter men 4414 jekemenshik turǵyn úıdi aralady. Al, «Esil» aýdanynda saılaýshylar tizimin anyqtaý jumystaryna 157 volonter tartylǵan. 18 naýryzǵa deıin volonterlar 197 turǵyn úı men 1654 jekemenshik turǵyn úıde bolǵan. Qalanyń atqarýshy bıligi turǵyndardan bul sharalarǵa túsinistikpen qaraýǵa jáne volonterlar usynǵan anketalardy toltyrýǵa shaqyrady. Barlyq suraqtar boıynsha tómendegi meken-jaılarǵa habarlasa alasyzdar: «Esil» aýdany - Qabanbaı batyr dańǵyly, 33. Tel.: 46-61-51, 78-06-83, 46-74-70; «Saryarqa» aýdany - Saryarqa dańǵyly, 13, №311 kab. Tel.: 55-66-48, 55-66-09, 55-74-88; «Almaty» aýdany - Táýelsizdik dańǵyly 7, tel.: 36-23-99, 35-02-84, 35-45-27.
