Astana ákimdigi sapasyz qar tazartý týraly synǵa jaýap berdi
ASTANA. QazAqparat - Bıylǵy qysta qardyń mol túsýine baılanysty, qalalyq kommýnaldyq qyzmetter atqaratyn mehanıkalandyrylǵan jumystar toqtaýsyz júrip jatyr.
Elorda aýmaǵyn sanıtarlyq tazartý jumystary belgili bir mehanızm boıynsha kezeń-kezeńmen júrgiziledi. «Birinshi kezeń qar óte mol jaýǵanda qolǵa alynady. Tyrmaly-şetkaly qondyrǵymen jabdyqtalǵan arnaıy mashınalar qardy joldyń jıegine jınaıdy. Mehanıkalandyrylǵan jınaýdyń ekinshi kezeńinde avtogreıderler jumysqa kirisedi. Olar jınalǵan qardy jaldap úıip tastaıdy», - delingen qalalyq ákimdiktiń saıtynda.
Sodan keıin tabandy tıegishterdiń kómegimen qar KAMAZ-darǵa artylady.
Sońǵy kezeńde jınalǵan qar Jeleznodorojnyı kentinde, «Qosshy» aýylynyń mańynda «Rýbej» beketiniń syrtynda jáne Astrahanka tas jolynda ornalasqan polıgonǵa shyǵarylady.
Kúsheıtilgen rejımde jumys istegende qar qala aýmaǵyndaǵy ýaqytsha qoımaǵa arnalǵan arnaıy stansalarǵa shyǵarylady. Eske sala ketsek, sońǵy 10 jylda jaýmaǵan qar kólemine baılanysty Astana ákimdigi kóshelerdi qardan tazartýǵa bar kúshin salýda.
