Astana ákimdigi «Rýhanı jańǵyrý» baǵdarlamasynyń bir jyldyǵyn qorytyndylady

ASTANA. QazAqparat - Búgin Astana qalasy ákimdigi men L.N. Gýmılev atyndaǵy Eýrazııalyq Ulttyq ýnıversıteti birlesip Elbasynyń «Bolashaqqa baǵdar: rýhanı jańǵyrý» atty eńbeginiń bir jyldyǵyna arnalǵan «Rýhanı jańǵyrý: ulttyq biregeılik - sanany qalyptastyrý negizi» atty ǵylymı-tájirıbelik konferentsııasy ótkizdi, dep habarlaıdy QazAqparat.

Qala ákimdigi saıtynyń habarlaýynsha, konferentsııada «Rýhanı jańǵyrý» baǵdarlamasy aıasynda atqarylǵan jumystar men ıgi bastamalar zerdelenip jáne baǵdarlamany aldaǵy ýaqytta tıimdi júrgizý jóninde usynystar men pikirler ortaǵa salynyp, talqylandy.

Ǵylymı jıynǵa Astana qalasy ákiminiń orynbasary Ermek Amanshaev qatysyp, ótken bir jylda atqarylǵan is-sharalardy qorytyndylap bolashaqta atqarylar jumystar jaıly aıtyp berdi.

«Bul baǵdarlamanyń qazaq órkenıetiniń damýyna qosqan úlesi ushan-teńiz. Buǵan tek zııaly qaýym ókilderi ǵana emes, ekonomıkalyq, áleýmettik klaster ásirese jastar qyzý aralasyp baǵdarlamanyń mán-maǵynasyn tereńdete tústi jáne qalyptasqan, anyqtalǵan, belgilengen ártúrli baǵdarlarda usynyldy. Astana qalasynyń ákimdigi osy baǵdarlamanyń júzege asýyna eki júzden astam shara ótkizdi. Onyń ishinde tárbıe-bilim, «Qasıetti Astana» baǵytynda kóptegen sharalar ótti. Elordamyzdyń tarıhyn tanýǵa, tanytýǵa arnalǵan, bizdiń belgili ǵalymdar qatysqan konferentsııalar, ashyq sabaqtar, stýdenttermen kezdesýler ótti», - dedi E.Amanshaev.
 

Osy jyly «Rýhanı jańǵyrý» baǵdarlamasynyń aıasynda Elorda tarıhynyń ártúrli kezeńine jatatyn mádenı, tarıhı, arheologııalyq eskertkishterdi tańdap «Qasıetti Astana» atty aıdarymen kitap jáne elektrondy qosymshalar etip shyǵarý josparlanǵan.