Astana ákimdigi múmkindigi shekteýli balalarǵa qarjylaı kómek kórsetti
ASTANA. QazAqparat - Búgin elorda ákimdigi ǵımaratynda jyl saıynǵy múmkindigi shekteýli balalardy tárbıelep otyrǵan otbasylarǵa aqshalaı sertıfıkattar tapsyrý qaıyrymdylyq aktsııasy ótti.
Astana kúnin qoryta kelgende, merekelik sharalarǵa qatysqan qala turǵyndary men qonaqtarynyń arqasynda jınalǵan aqsha múmkindigi shekteýli balalarǵa kómek retinde beriledi. Aktsııa aıasynda búgin 52 bala Astana qalasy ákimdiginiń atynan jalpy 26 mln teńge kóleminde qarjylaı kómek aldy. Jalpy, 130 ótinish kelip túsken. Barlyq ótinishterdi Densaýlyq saqtaý basqarmasy, Jumyspen qamtý jáne áleýmettik baǵarlamalar basqarmasy, sonymen qatar, úkimettik emes organdardyń ókilderi kirgen komıssııa qarady. Komıssııa ár balanyń dıagnozy men emdelý qarqynyn qaraı otyryp, jedel medıtsınalyq kómekke zárý 52 adamdy anyqtady.
