Astana ákimdigi múmkindigi shekteýli 240 azamatty jumysqa ornalastyrdy
ASTANA. QazAqparat - Astana ákimdigi múmkindigi shekteýli 240 azamatty jumysqa ornalastyrdy. Bul jaıynda búgin Astana qalasy ákiminiń baspasóz hatshysy - baspasóz qyzmetiniń jetekshisi Elvıra Júrgenbaeva málim etti, dep habarlaıdy QazAqparat.
«Búgingi tańda Astanada 20945 múmkindigi shekteýli azamat tirkelgen. Onyń ishinde 1-top múgedekteri - 2206, 2-topta - 7828, 3-topta 7054 adam bar. Al 18 jasqa deıingi múmkindigi shekteýli balalar sany - 3857. Elordada múmkindigi shekteýli azamattarǵa 19 arnaıy jasaqtalǵan «Invataksı» kólikteri tegin qyzmet etedi. Bul kómek túrine búginge deıin 457 adam júginse, onyń 147-si balalar», - dedi ol.
Ákim baspasóz hatshysynyń aıtýynsha, elordada arnaıy sanatqa jatatyn azamattarǵa áleýmettik kómek retinde birqatar qyzmet túri kórsetiledi. Máselen, 2017 jyly 17200 adamǵa qoǵamdyq kólikte tegin júrý qyzmeti, jer úıde turatyn múmkindigi shekteýli azamattarǵa qajetti otyn-sýmen kómektesý, 1-2 toptaǵy múgedekterge tegin tisin protezdeý múmkinshiligi berilgen. Áleýmettik tapsyrys aıasynda osy jyly 600-ge jýyq azamatqa qajetti kómek kórsetilgen.
«Astana qalasy turǵyndaryn jumyspen qamtý keshendi jospary aıasynda 2017 jyly múmkindigi shekteýli azamattardy jumysqa turǵyzý sharalaryn kúsheıtý qolǵa alyndy. Nátıjesinde Astana qalasy ákimdiginiń tarapynan 240 azamat jumysqa tartyldy. Bul jumys áli de qarqyndy túrde jalǵasýda», - dedi Júrgenbaeva.
